Наумовски: Уставен нема да седи со скрстени раце!

„Незадолство од одлуките на судот имало и во време на СДСМ и на ВМРО-ДПМНЕ“, рече новиот претседател на Уставен суд

Уставен суд нема да седи со скрстени раце и уште посилно ќе ги брани легитимитетот и интегритетот на оваа институција, како и своите одлуки со кои се штитат уставноста и законитоста на актите. Вака гласи пораката на новиот претседател на Уставен суд, Бранко Наумовски, кој вчера и официјално ја презеде функцијата од својот претходник Трендафил Ивановски.

Во своето прво обраќање пред јавноста, Наумовски јавно им се заблагодари на своите колеги и на досегашниот претседател што му дале доверба да ја води и претставува институцијата во наредните три години. Рече дека ќе продолжи со уште посилно темпо во извршувањето на нивната уставна функција и доколку треба ќе преземе мерки за извршување на одлуките. Наумовски е свесен дека доаѓа на челната позиција во исклучително турбулентен период, во кој институцијата, како што рече, е изложена на „неосновани критики, инсинуации и девалвации“ и побара партиите да ги тргнат рацете од судот.

„Не е добро за оној што ги изрекува ваквите инсинуации, бидејќи на тој начин се покажува непочитување на институциите, а со тоа и на државата“, потенцираше новиот претседател на Уставен суд.

Наумовски не го загрижуваат нападите на владејачката партија, која, уште на денот на неговиот избор, изрази сомневање околу неговата непристрасност. Тој смета дека тоа нема да биде товар во неговата работа, бидејќи, како што рече, целата своја кариера ја градел чесно и врз основа на стручност. Наумовски демантираше дека некогаш бил заменик-министер за правда, туку рече дека ги извршувал највисоките функции во администрацијата. Потсети дека кога бил избран за народен правобранител, тоа било направено со ниту еден глас против, а само со еден глас воздржан при изборот за уставен судија.

Во однос на забелешките дека членови од неговото семејство и' припаѓаат на опозицијата, тој рече дека она што се однесува на нивниот приватен живот ниту сака ниту може да го промени.

Рече дека во својот шестгодишен мандат како судија не трпел никакво политичко влијание, а дури и ако има, битно е да не се подлегне на притисоците.

„Реакции имало и ќе има, имало и ќе има и протести, зашто сите не се задоволни од нашите одлуки, но не може да се каже, како што рече еден министер неодамна, дека одлуката на Уставен суд е неаргументирана“, додаде Наумовски. Тој рече дека незадоволство од нивните одлуки имало и во време на СДСМ, но зошто сега толку се изразени критиките од власта, може само да се претпостави.

„Не гледам дека судот правел отстапки кон која било партија, па нема тоа да го прави ниту во иднина“, потенцираше новиот претседател на Уставен суд, при што рече дека смета оти и оние одлуки, кои предизвикале големи реакции, биле доволно стручни и аргументирани. (Г.Д.)