Вози се со мене поудобно за истите пари

Дивите превозници со овие зборови најчесто „ги крадат“ патниците од легалните транспортери

Сања Наумовска

„Вози се со мене, ќе те однесам до дома за истите пари. Ќе ти биде поудобно во автомобил наместо во автобус“, се најчестите мамки со кои дивите превозници во меѓуградскиот сообраќај ги привлекуваат патниците. Се нудат да го однесат и куферот до врата, само за да обезбедат четворица патници за да си ја реализираат турата. Кавгите и навредите со возачите на автобусите на легалните превозници, се секојдневје, во борбата за патник повеќе. За спречување на физичките пресметки често реагира и обезбедувањето на автобуските станици или полицијата. Трката продолжува и по патиштата, кој прв ќе стаса до следната станица, ако треба да се качи уште некој патник.

Најпрофитабилни, за дрските превозници, се кратките релации од Скопје до Куманово, Велес и Тетово, но добро одат и турите до Крива Паланка, Штип и Гостивар. За разлика од легалните, кои влегуваат само на автобуските станици, нерегистрираните превозници патници собираат на секој чекор. Најчесто чекаат во близина на станиците, каде што најлесно „се крадат“ патници. Во Скопје „базата“ е кај старата автобуска станица на „Пролетер“. Иако се на само стотина метри од Министерството за транспорт и врски и пред носот на патните инспектори, тоа не ги спречува да си ги тераат бизнисот.

Речиси половината од превезените патници се возат со диви возила, велат од Здружението на превозници во патниот сообраќај „Исток“. Се жалат дека тоа им го уништува бизнисот, но и остава голема дупка во буџетот. Нелегалните не плаќаат ниту еден денар данок, а целиот профит си го ставаат в џеб. Не се обврзани да користат квалитетно гориво, а го избегнуваат и плаќањето патарини. Не помагаат ниту прекршочните пријави што им ги поднесуваат инспекторите, бидејќи најчесто тие не добиваат судска завршница. Најголемиот дел од нив застаруваат, а ако некој добие казна, таа е неколкупати помала од предвидените во законот.

„Од Скопје до Куманово и обратно дневно се превезуваат околу 10.000 патници. Имаме податоци дека во последната година половината се возат со нерегистрирани превозници. Тоа е огромен процент, а нашата штета непроценлива“, вели Горан Трпковски, претседател на „Исток“. Решението за состојбата е судовите постапките да ги спроведуваат до крај и да изрекуваат високи казни, смета Трпковски, бидејќи, како што вели, на овој начин дивите превозници само се охрабруваат и се зголемува нивниот број. „Ако продолжи оваа состојба, голем број од превозниците наместо да инвестираат и да купуваат нови автобуси, ќе почнат да отпуштаат работници“, вели Трпковски.