Болниците не ја слушаат Владата

Болниците и клиниките по се' изгледа дека ги немаат вратено вишоците од плати и дежурства што им ги поделија на вработените лани по грешка поради незнаење за примена на концептот бруто-плата. Иако рокот што го даде Владата е пробиен веќе две недели, ниту во Фондот за здравствено осигурување ниту во Министерството за здравство не знаат кои од болниците и од клиниките ги вратиле незаконски поделените пари или, пак не сакаат да откријат кој не го почитува зборот на Владата.

Од Министерството за здравство се правдаат дека сега се изготвува извештајот за тоа кои болници и клиники ги исправиле утврдените неправилности, по што тој ќе биде презентиран на Владата. Во Фондот, пак, велат дека се' уште се врши контрола на теренот што би требало да заврши до крајот на неделава, по што ќе излезат со анализа кој колку ги испочитувал препораките на Владата.

И покрај тоа што фондовските контролори требаше да ја завршат целата работа до вчера, барем така првично најавија од Фондот, сега одеднаш во Фондот го пролонгираат рокот со објаснување дека бил направен превид во датумот за контролата. До први ноември бил рокот за нови 20 здравствени установи што биле на попис за финансиско чешлање, а петти ноември бил рок за првите 20 веќе проверени болници и клиники. Во Фондот не знаат ни според кој модел болниците и клиниките ќе ги враќаат вишоците.

Колку пари се во прашање по основа на поделените вишоци, точно не се знае, туку се вели дека тие заземаат од 30 до 80 отсто од буџетите на клиниките и болниците. (Ј.Ј.)