Белорусија нуди признавање на Јужна Осетија заради гас
МОСКВА - Белорусија би можела да и' каже на Русија дека ќе ги признае бунтовничките грузиски региони Јужна Осетија и Абхазија како независни држави во замена за умерени цени за руски гас во 2009 година, објави вчера еден руски весник.
Бизнис-весникот „Комерсант“ објави пред разговорите меѓу претседателите на Русија и на Белорусија дека Минск би можел да понуди да и' продаде на Русија акции во државната компанија за транзит на гас „Белтрансгас“ за да обезбеди постигнување договор околу цената на гасот и да добие заем во рубли од Москва, како помош за Белорусија во надминувањето на глобалната финансиска криза.
Русија навлече меѓународна осуда на себе кога ги призна сепаратистичките грузиски региони како независни држави, по кратката војна со Грузија во август годинава, која почна по обидот на Тбилиси со употреба на сила повторно да ја преземе контролата врз Јужна Осетија.
Лукашенко веднаш не ја призна независноста на регионот, наведувајќи дека парламентот ќе го разгледа тоа прашање. Парламентот не презеде никаква акција. „Претседателот на Белорусија навистина има нешто да му понуди на својот руски колега и од политички и од економски аспект“, беше цитирана изјавата од страна на „Комерсант“ на анонимен извор пред разговорите планирани за вчера меѓу рускиот претседател Дмитриј Медведев и неговиот белоруски колега Александар Лукашенко. (Ројтерс) |
