Мандатот на рускиот претседател продолжен на шест години
Путин можеби ќе се врати на претседателската функција
МОСКВА - Нацрт-законот за продолжување на претседателскиот мандат од четири на шест години е поддржан од Горниот дом на парламентот на Русија, откако го прифатија регионалните собранија. Сите присутни сенатори на Советот на Федерацијата ја поддржаа одлуката на собранијата за продолжување на мандатот, што претставува последен чекор во процесот на законодавно одобрување. Минатиот месец, и Долниот дом и Горниот дом го одобрија Нацрт-законот. Брзото напредување на Нацрт-законот се гледа како знак дека Владимир Путин можеби наскоро ќе се врати на претседателската функција. За промените беше потребна поддршка од најмалку две третини од регионалните законодавства во земјата и тие беа едногласно одобрени, јавуваат руските новински агенции.
Амандманот ќе стане закон откако ќе го потпише претседателот Дмитриј Медведев, но ќе стапи во сила по следните претседателски избори. Путин стана премиер годинава, откако беше обврзан со Уставот да се повлече по два едноподруги претседателски мандати. На претседателската позиција го наследи Медведев.
Аналитичарите истакнуваат дека секогаш се претпоставувало оти Путин може да се врати откако ќе заврши еден мандат на Медведев. Но, очигледното брзање да помине овој уставен амандман некои го гледаат како знак дека Путин брза и може да се врати многу поскоро. Потоа, потенцијално би можел да работи уште два шестгодишни мандата.
Нацрт-законот, исто така, го продолжува мандатот на Долниот дом, државната Дума, од четири на пет години. Владата истакнува дека уставните промени се потребни, бидејќи сегашниот четиригодишен мандат е премногу краток за да се имплементираат сериозни реформи во толку голема и комплексна земја. (Би-Би-Си) |
