Гуштеров отвори војна против градоначалникот на Штип

Што си кажаа на телефон градоначалникот и бизнисменот

Иван Бојаџиски



Штип - Речиси тотално замрената политичка сцена во Штип деновиве ја растресе бизнисменот Ристо Гуштеров кој, гостувајќи на една локална телевизија во Штип, го нападна градоначалникот Зоран Алексов. Гуштеров, кој во емисијата на водителот Т��ни Михаилов беше поканет да говори за сите аспекти околу изградбата на фабриката на Џонсон контролс, неочекувано се нафрли врз штипскиот градоначалник..

„Градоначалникот Алексов не треба да се занимава со лаги туку да си го крене задникот и да оди по фирмите, да разговара со бизнисмените, да види како да и помогне на економијата, односно да работи за доброто на Штип“, рече Гуштеров.

Гуштеров предметот на својата голема лутина кон градоначалникот Алексов го најде во едно соопштение кое пред јунските избори беше пуштено преку локалните медиуми а каде како адресант стоеше изборниот штаб на ВМРО - ДПМНЕ. Во соопштението Ристо Гуштеров беше обвинет дека лаже во однос на најавената голема инвестиција со Џонсон контролс, односно дека во Штип нема да има фабрика на оваа американска компанија.

Дваесетина дена по настапот на Гуштеров на истата телевизија гостуваше градоначалникот Алексов. Тој појасни дека неговиот критичар ја погрешил адресата на која ја упатува својата лутина. „Јас немам ништо со тоа соопштение бидејќи на предвремените парламентарни избори не бев член на регионалниот изборен штаб како на изборите во 2008 година. Но, очигледно е дека на господинот Гуштеров некој му дал погрешни информации во врска со тоа соопштение. Надвор од секаква логика е јас како градоначалник да бидам против една така голема и значајна инвестиција и секогаш јавно истата сум ја подржувал и ја подржувам“, е краткото појаснување на Алексов во однос на судирот кој го наметна Гуштеров.

Штипскиот градоначалник вели дека телефонски се слушнал со Гуштеров и дека се договориле да се видат и да ги расчистат сите нејаснотии во врска со оваа пикантна политичка манџа од која дваесеттина денови се насладуваат штипјани вечно гладни за политички пикантерии.

На локалната политичка сцена вмровското членство со нетрпение го очекува својот нов локален лидер. Изминаа два месеци од затворањето на огласот за претседател на ОК на ВМРО- ДПМНЕ. На интервју пред комисијата формирана од Извршниот комитет, беа сите 27 кандидати. Трајче Димков, актуелен општински лидер на оваа партија, кој оваа позиција мора да ја напушти бидејќи е избран за пратеник, ни изјави дека наскоро ќе се знае името на неговиот наследник.

„За нас од првостепено значење е фактот дека имаме најдемократски избори во кои секој наш член кој смета дека со успех ќе може да ја извршува оваа функција доби можност да се пријави на огласот. По извршените интервјуа очекуваме на чело на Општинскиот комитет да добиеме личност која ќе го продолжи континуитетот на успешната политика која нашата партија ја води на општинско и на државно ниво“, ни изјави Димков.

Штипските социјалдемократи пак целата своја енергија ја насочуваат кон локалните избори во 2013 година. „Ние сега сме преокупирани со внатрепартиски активности. Наши пратеници на чело со Емилијан Станковиќ, и од општинското раководство на партијата, сме постојано меѓу луѓето. Наша примарна цел е да ги добиеме локалните избори на што силно сме посветени“, кратко ни изјави Новит Здравев, претседател на општинската организација на СДСМ.