Нацева: Нашата шанса се вика Хрватска
Екскапитенот на Македонија смета дека Србија е поопасна во дебито на ЕП како самостојна држава
Иако мнозинството во и околу македонскиот табор шансата за пласман во вториот круг ја гледа во натпреварот од последното коло во групата в сабота со Србија, некогашниот капитен на репрезентацијата на Македонија, Гордана Нацева, типува на утрешниот дуел со Хрватска.
„Во контакт сум со Бранка Јовановиќ, која е тренер на голманите во српската селекција, и од неа слушам дека горат од желба да се прикажат во најдобро светло по раздружувањето со Црна Гора. Имаат добар селектор(Часлав Динчиќ - н.з.), како и неколку одлични ракометарки, пред се' Лекиќ од Крим, која трет стрелец во Лигата на шампионите, а тука се и Ериќ и Огњеновиќ. Хрватките, пак, долго ги немаше на големите натпреварувања, а лани одигравме нерешено со нив на СП во Франција, што значи дека можеме да се носиме со нив“, проценува македонската ракометарка на векот.
Крајниот дострел на Македонија на ова првенство, според Нацева, е пласман во вториот круг.
„Од тоа што го видов на контролниот меч со Шпанија, мислам дека немаме тим за пробив меѓу осумте најдобри. Одбраната не ни е агресивна, речиси и да не прави прекршоци, дозволувајќи му на противникот течни акции и циркулација на топката. Од друга страна, во нападот не гледам играч меѓу бековите од кого би можеле да се очекуваат сигурни 5-6 гола на секој меч“, анализира легендата на македонскиот женски ракомет.
На прашањето за првиот фаворит за титулата, Нацева како од топ одговара - Норвешка.
„Финалето на Олимпијадата во Пекинг покажа дека Русинките се побавни и веќе тешко им парираат на брзите и комбинаторни Норвежанки. Руската игра како да е прочитана“, вели Нацева. (Р.Д.) |
