Акопјан нема да седи на клупата
Радуловиќ дефинитивно отпадна од составот за првиот круг на првенството
Левон Акопјан нема да дели совети од клупата на македонската репрезентација во текот на натпреварите од Европското првенство за ракометарки. И покрај најавите, поранешниот трофеен тренер, а сега претседател на Динамо Волгоград, кој дојде минатиот вторник за да помогне како советник на Стручниот штаб, не се најде меѓу шесте официјални лица во македонскиот тим дефинирани на последниот технички состанок на ден пред почетокот на шампионатот. На таа листа останаа селекторот Владимир Глигоров, водачот на тимот Иван Бојков, помошникот-тренер Ангел Велков, директорот на репрезентацијата Димитар Тодоровски, докторот Никола Силјановски и масерот Рубинчо Србиновски.
Меѓу 16. ракометарки што ќе го претставуваат домаќинот во првиот круг ја нема Валентина Радуловиќ, чија повреда на лигаментите на десното колено и дефинитивно ја оддалечи од настап, најмалку во групата од прелиминарната фаза. На конечниот список за првиот круг се голманите Андреева, Треноска и Наумоска, крилата Пецевска и Тодоровска, бековите Барјамоска, Коцевска, Портјанко, Црвенкоска, Кресоја, Бујанова, Ѓорѓиевска и Новеска, како и пикерите Младеновска, Мечевска и Илкова. Две од овие ракометарки по првиот круг можат да бидат заменети со две од поширокиот список од 28 играчи пријавени во ЕХФ до 30 октомври.
Норвешка го изостави пикерот Сузан Торсгорд и за првиот круг пријави 15 играчи. Украина ги „избриша“ десното крило Јулија Гарбаренко и пикерот Дарја Фисјук. Од хрватскиот состав, пак, во последен момент отпаднаа голманката Јелена Грубишиќ и средниот бек Нина Јукопила. (Р.Д.) |
