„Случајот Сопот“ влезе во Собранието
Пратениците, главно, од партиите на Албанците, оценија дека се работи за монтиран случај
Светлана Унковска
Посебна работна група формирана од собраниската Анкетна комисија ќе биде задолжена да ги собере информациите и аргументи за „случајот Сопот“, по што на комисијата ќе и' приложи целосен извештај околу овој случај. Ова е заклучокот од вчерашната седница на Анкетната комисија за заштита на слободата и граѓаните која на иницијатива на пратеничката група на Нова демократија расправаше за овој случај. На седницата, покрај членовите на Комисијата, присуствуваа и роднините на осудените, како и претставници на Министерството за внатрешни работи и за правда, од канцеларијата на ЕУ и на ОБСЕ, како и народниот правобранител.
Во своите излагања, пратениците, главно од партиите на Албанците, оценија дека се работи за монтиран случај и дека пресудата е донесена само врз основа на една изјава на сведокот Рамадан Бајрами, која била дадена под притисок, за што тој проговори јавно и преку официјална изјава. Актуелниот народен правобранител Иџет Мемети, кој за време додека траеше судскиот процес беше министер за правда, смета дека е потребно повторно отворање на постапката. Пратеникот Владо Бучковски, пак, тогашен министер за одбрана, ги пренесе сомнежите што му ги искажал поранешниот НАТО-амбасадор Николас Бигман за водењето на целиот процес.
„Тоа за што расправаме е ужас и вистинско насилство на демократијата. Фактот дека лицата се осудени само со една изјава дадена под притисок укажува дека се работи за монтиран случај, кој воопшто не кореспондира ниту со законските ниту со човековите норми, а кои некој ги злоупотребува за свои политички цели“, истакна претседателот на Нова демократија, Имер Селмани, кој побара К��мисијата откако ќе донесе заклучоци за овој случај, да се отвори расправа и на собраниска седница. Со ваквиот предлог се согласи и пратеникот на ДУИ Сафет Незири, кој рече дека поставената мина кај селото Сопот за жителите на ова кумановско село донело лош период.
„Не може еден случај да се затвори и да се осудат луѓето само од изјавата на еден сведок. Бајрами бил лишен од слобода и однесен во затворот во Шутка од каде што излегол со повреди, што укажуваат на тоа дека таму бил физички малтретиран. Потоа, тој изјавил дека претходно се изјаснил под притисок, физичко малтретирање и закани“, истакна Незири.
Пратеникот на СДСМ Владо Бучковски, кој во тоа време беше министер за одбрана, изнесе детали од разговорите со тогашниот НАТО-амбасадор Николас Бигман.
„Во 2003 година, НАТО правеше напори да ги открие причините за овој нелогичен инцидент. Нелогичен е затоа што е позната вербата на албанското население со НАТО и единствено остана претпоставката дека мината била наменета за војниците на АРМ. Во разговорите со амбасадорот на НАТО, Николас Бигман, на заминување од земјава остави аманет да ги исполниме условите за прием во Алијансата, но истовремено изрази и убедување дека лицата се невини“, рече Бучковски.
Пратеникот на ВМРО-ДПМНЕ Јован Гинев рече дека не може да има аргументирана расправа за овој случај ако не се земат предвид и други докази и ако не се разгледа и судската одлука.
Народниот правобранител и поранешен министер за правда, Иџет Мемети, потенцира дека формирањето работна група ќе ги испита сите аргументи и ќе придонесе за да се тргне сомнежот од случајот со Сопот. „Треба добро да се размисли да не се дозволи вакви случаи да ги подгреваат националните страсти, што не е добро за државата. Затоа треба побрзо да се расчистат сомнежите“, истакна Мемети.
Пратеникот на ДПА Имер Алиу му честиташе на Бучковски за изјавата, но, од друга страна, пак, го обвини народниот правобранител Мемети дека води „бајата дискусија“, наместо да најде решение за ослободување на осудените, а некој да понесе одговорност за овој случај. |
