Претходен број

Тачи бара нови државни симболи

ТЕТОВО - „Реализацијата на понудениот договор не ја условуваме временски, туку суштински. Станува збор за десетина суштински прашања, меѓу кои државните симболи - химната, знамето, грбот, се основни. Ако сме мултиетничка држава, тогаш и симболите треба да имаат заедничка карактеристика. Сегашните симболи водат само кон разделби“.

Ова го изјави лидерот на ДПА, Мендух Тачи, на вчерашната средба со новинарите во Тетово, на која официјално беше обелоденет интегралниот текст на политичкиот договор што го предлага ДПА. На новинарско прашање која е суштинската разлика меѓу Охридскиот договор и овој што го нуди ДПА, Тачи одговори: „Можеби предложените разлики во нашиот договор навидум се мали, но затоа се од битен карактер. Во основа, тие се сведуваат на три моменти: Охридскиот договор веќе е паднат, немаше прецизен тајминг за реализација и недостасуваа санкции за институциите или раководителите на тие институции кои не го почитуваа“.

На забелешката дека претставниците на меѓународниот фактор не го прифаќаат договорот на ДПА, туку стојат зад Рамковниот документ, Тачи со став: „Тоа што е договарано во Охрид не е ничија своина“.

Според лидерот на ДПА, состојбата во земјата е многу тешка, а Владата е пред крах. „Блокиран ни е приемот во ЕУ и во НАТО, има невидена економска криза за која Груевски пред изборите нудеше големи решенија. Исто така, расте и меѓуетничка нетрпеливост, која всушност ја подгрева оваа Влада со чуден спој. Едни трошеа големи буџетски средства, а командантите големи пари од дијаспората. Епилогот со ваквиот неприроден спој на Владата е познат“, констатира Тачи. Тој соопшти дека ДПА нема намера да ја урива Владата и не поддржува идеи за техничка влада ниту, пак, иницијативи за предвремени избори. (Г.Е.)