Обдукцијата треба да потврди дека бактерија ја усмрти Барбара
Министерството за здравство ги очекува официјалните резултати од обдукцијата на 18-годишната Барбара Лазарова од Штип, која почина по летувањето во Црна Гора. Официјалните резултати се очекуваат денеска, а неофицијално се зборува дека вештачењето ги потврдило првичните сомневања дека причина за смртта кај матурантката бил отровот што го испуштила бактеријата ешерихија коли. Според експертите, оваа бактерија најчесто се појавува во недопеченото месо, но може да ја има и во водата.
Каде влегла бактеријата во телото на штипјанката се' уште не се знае. Нејзината мајка е убедена дека причините лежат во ресторанот „Лајф“ во Будва каде што се хранела Барбара. Но, од црногорското Министерство за здравство се произнесоа дека во „Лајф“ се' било чисто, иако не прецизираа зошто истрага започнале неколку дена по смртта на девојчето. (Г.А.) |
