Претходен број

ММФ греши, тврди Владата

Според министерот Славески, ММФ тргнал од погрешни претпоставки и дал погрешни препораки

Александрија Стевковска

Извештајот на Бордот на директори на ММФ погрешно ја претставува фактичката состојба во земјава, смета министерот за финансии, Трајко Славески, оценувајќи го извештајот како тргнат од погрешни претпоставки, кој дал и погрешни заклучоци и погрешни препораки.

Во контекст на тоа, Славески не смета дека Владата се однесува трошаџиски, дијагноза што ја постави ММФ проучувајќи го буџетот за идната година и повикувајќи ја државата да ја заузда јавната потрошувачка. Министерот за финансии ги оквалификува како неточни речиси сите препораки и согледувања на Бордот на директори на ММФ.

„Не ми јасно од каде е констатацијата дека Македонија има висок надворешен долг. Јавниот надворешен долг е сведен на најниско ниво во однос на сите соседни земји, или 25,8 отсто од БДП. Се тврди дека, наводно, приватните трансфери се намалуваат, иако тоа беше случај само за првиот дел од годинава, а претпазливоста доаѓаше од очекувањето за признавање на Косово. Тоа беше политички шок кој беше преброден за потоа да се стабилизираат приватните трансфери“, потенцира Славески.

Владата, според Славески, останала неразбрана со ММФ за еден фундаментален пристап, односно користењето контрациклична фискална политика.

„Не се јасни препораката и забелешката што се однесуваат на обесхрабрување на инвестиции во инфраструктурата, кога ММФ препорачува зголемено фискално трошење како една контрациклична мерка за пресретнување на кризата. Не знам зошто еден лек што им го препорачува на сите земји не би функционирал и во случајот со нашата“, објасни Славески, за веднаш потоа да изјави дека Владата се одлучила за инвестирање во инфраструктурата многу пред светската економска криза, а не како начин за надминување на последиците од кризата.

„Во време на дискусии за буџетот Владата е свесна за предизвиците и за неизвесностите што стојат пред нас. Сите мерки што се преземаат се насочени кон ублажување на последиците од кризата. Сметаме дека нашите политики се добро поставени за да одговорат на тие предизвици“, смета министерот за финансии, Трајко Славески.

Тој како неразбирливо го оцени охрабрувањето на ММФ централната банка и натаму да ги зголемува каматните стапки кога сите земји во светот водат експанзивна фискална политика и ги намалуваат каматните стапки.

„Нема да дозволиме задушување на македонската економија, односно тоа не се препораки и политики што водат кон ублажување на последиците од кризата и одржување на растот“, истакна Славески.

Најголемата забелешка на ММФ за Владата се однесува на делот во преголемото олабавување во трошењето на државните пари, што според опозицијата е најуочливо во нејзиното саморекламирање. За опозицијата, неразбирливо е државата да се задолжува за некои проекти, како што е на пример предвидениот заем од ЕБОР за изградба на патишта во висина од 50 милиони евра, средства кои можат да се изнајдат од домашни извори ако, на пример, се скрати од ставката за реклами.

„Според неофицијални извори, во 2007 година Владата потрошила околу 23 милиони евра за реклами, за годинава не се знае, а според количината за реклами за идната година, најверојатно, во 2009 година ќе бидат потрошени 50 милиони евра за таа намена. Притоа, со зголемувањето на буџетскиот дефицит за идната година, наместо да се финансираат развојни проекти, ќе се финансираат рекламите на Владата“, обвини вчера Јован Манасиевски на седницата на Комисијата за финансирање и буџет.

Игор Ивановски од СДСМ нагласи дека опозицијата поддржува инфраструктурни проекти, но за нив треба да се најдат средства од домашни извори.

„Педесет милиони евра има во Македонија од рекламите, како и од платите на партиските војници вработени преку агенциите за привремено вработување, преку кои годишно се исплаќаат 72 милиона евра. Ако се откажете од една третина од овие вработувања, ќе можете да реализирате дел од проектите за кои сакате да се задолжувате“, смета Ивановски. Според него, Владата води погрешна политика зашто претходно вратила кредити кои биле со многу поповолни услови, а сега ќе се задолжува кога кредитите се поскапени и неповолни.

Според министерот за финансии, средства што служат за промоција на земјава и некои владини мерки значително не влијаат на буџетот, што значи дека не може на тие средства да се потпре државата за да ги инвестира во инфраструктурата. (А.С.)