Претходен број

Анализа

Бучковски на бришан простор

Каква разлика прават само две години

Воздржана и студена реакција на СДСМ по судската пресуда против нивниот некогашен лидер

Соња Крамарска

Најголемата опозициска партија СДСМ, која се соочува со длабока криза во своите редови, од завчера носи уште еден товар. Нејзиниот некогашен партиски лидер и шеф на владата Владо Бучковски е осуден на затворска казна во времетраење од три и пол години.

Делото поради кое му се судеше на Бучковски е флоскула што стана синоним за владеењето на балканските политички елити по распадот на поранешна Југославија - злоупотреба на службено овластување. Многумина високи функционери во Македонија, и од левицата и од десницата, беа под сомневања за такво дело, но досега таква ригорозна санкција не стаса до ниту еден од врвната премиерска и претседателска лига.

Социјалдемократите на Бучковски, чиј лидер беше и тој во периодот од почетокот на 2005 година, па до крајот на 2006 година, ја дочекаа пресудата со неверба и со сомневања во непристрасноста на судот. Тие имаат причина повеќе за загриженост.

Нивната популарност меѓу граѓаните е два и пол пати помала отколку популарноста на ривалската партија ВМРО-ДПМНЕ, а во март 2009 година ги чекаат претседателски и локални избори. Како кулминација на се' е завчерашната судска пресуда за буџетска штета на Македонија од повеќе од два милиона евра, за која судот тврди дека еден од оние што ги влечеле конците е некогашниот прв човек на СДСМ и на владата Владо Бучковски.

Пресудата против Бучковски некои ќе ја поздрават, а некои ќе ја осудат или, кажано народски, од оваа пресуда некому ќе му се стемни, а некому ќе му се раздени.

Во неговата СДСМ работите околу поддршката на Бучковски стојат многу заплеткано. Партијата, чиј поранешен лидер со соочува со затворска казна, која ако се случи ќе биде преседан во историјата на македонското судство и во историјата на политичките односи во земјава, вчера не покажа преголема загриженост за пресудата.

Повеќе од јасно е дека на страна на Бучковски останаа многу малку поранешни пријатели и соработници од левицата. Односите со довчерашната партиска претседателка Радмила Шекеринска му се студени.

Сегашн��от лидер, пак, Зоран Заев, кој ја направи партиската кариера преку врските со Бучковски, се сврте кон Црвенковски откако помина низ слични обвинувања како Бучковски, кои ненадејно финишираа со аболиција од страна на шефот на државата.

Како круна на се', односите на Бучковски со својот некогашен пријател и партиски ментор Бранко Црвенковски, кој полека се враќа на кормилото на СДСМ, се на мошне ниско ниво. Црвенковски, имено, на завчерашната попладневна трибина во Велес одбил да ја прокоментира веста за затворската казна на Бучковски, која одекна како бомба во политичките кругови и меѓу партиското членство на социјалдемократите.

Довчерашниот партиски секретар Горан Минчев, актуелниот партиски секретар Игор Ивановски, старо-новиот партиски потпретседател Јани Макрадули се луѓето кои одамна му го свртеа грбот на Бучковски.

Единствена блиска до Бучковски моментно може да се смета новата партиска потпретседателка Магдалена Несторовска, поранешна службеничка во Министерството за одбрана додека беше таму министер Бучковски, но прашање на време е кога и таа поддршка ќе биде прекината со оглед на рамнодушноста на СДСМ кон некогашниот партиски лидер.

Бучковски, вчера, во изјава за новинарите, изнесе дека партискиот лидер Зоран Заев и генералниот секретар Игор Ивановски, веднаш по изрекувањето на судската пресуда, дошле во неговата канцеларија, но повеќе од очигледна беше млаката официјална партиска реакција на СДСМ, која е далеку од реална политичка поддршка што социјалдемократите се подготвени во овој момент да му ја испорачаат на екслидерот.

Џевад Адеми, поранешен висок партиски функционер на ДУИ, која порано коалицираше во владата на Бучковски, а сега е коалициски партнер во Владата на актуелниот премиер Никола Груевски, вчера плашливо ќе констатира пред новинарите: „Не е добро во пресрет на изборите да биде осуден на затворска казна висок функционер на опозицијата“.

Поентата на Адеми е дека во моменти кога Брисел бара интензивирање на политичкиот дијалог меѓу власта и опозицијата, случајот со судската пресуда против Бучковски ќе ги влоши односите меѓу Груевски и СДСМ и дека тоа може да биде увертира во несакани изблици на незадоволство на денот на изборите.

Владата и владејачката ВМРО-ДПМНЕ вчера се воздржаа од коментари за Бучковски, но повеќе од сигурно е дека тие сметаат на политички поени.

Министерството за внатрешни работи, не толку одамна, изнесе податоци за силна корупциска афера и против Зоран Заев во моментите кога тој беше доживуван на политичката сцена како лидер во најава на социјалдемократите.

Овој случај кој му нанесе штета на СДСМ заврши со аболиција на Заев од страна на Црвенковски, што отвори многу сомневања. Заедно со случувањата околу Бучковски, тоа се два силни одвоени удара кои СДСМ ги претрпе во изминатите шест месеци, но дали ќе ги преживее без поголеми последици останува да се види.