Од грчкиот пазар повлечени 39 тони наут со пестициди
Атина - Триесет и девет тони наут, произведен во Индија, за кој е утврдено дека содржи остатоци од препарат за заштита на растенијата, се повлечени од грчкиот пазар. Одлуката за повлекување на наутот ја донесе Атинскиот окружен совет по контролата што беше извршена во магацините на фирмата "Трија алфа" во Атина.
Контролните органи во текот на испитувањето зеле примероци од наутот што биле испратени на лабораториска анализа. Според резултатите од контролата, фирмата во земјата увезла 48 тони од овој наут, од кој 3,2 тони биле обработени и спакувани во пакети од по 250 до 500 грама за потребите на грчките супермаркети. Додека траела контролата, 2,8 тони од токсичниот наут веќе биле продадени.
Раководството на синџирите супермаркети кои го продавале токсичниот наут им наредило на сите продавници да ги повлечат од рафтовите сите пакети со овој производ. Службата за контрола на храната во Грција ги повика сите потрошувачи кои веќе купиле ваков производ да не го консумираат. (МИА) |
