Шумахер: Се' уште можам да ја освојам титулата

Најуспешниот во Ф1-историјата својот оптимизам го темели на бодовниот систем и на долгата сезона

Михаел Шумахер инсистира дека се' уште е во трката за титулата, и покрај тоа што некои ривали веќе го отпишаа Мерцедес ГП. Тимот нема победа сезонава додека главните противници Ферари, Мекларен и Ред бул прокнижија по една. Германците имаат само еден подиум, за кој се избори Нико Розберг, кој се покажа побрз од Шуми досега.

Наспроти Розберг, кој импресионира, Шумахер се мачи да ја достигне потребната брзина по тригодишното отсуство од Формула 1 и засега има само девет поени. Неговиот недостиг од резултати ги подели мислењата во падокот во однос на тоа дали тој се' уште го има тоа што е потребно за да ја освои титулата. Еден од возачите што верува во тоа е Фернандо Алонсо.

„Тој е се' уште Михаел Шумахер што го знаеме“, изјави тој неодамна за „Билд“. „Навистина верувам дека Михаел ќе биде сериозен конкурент за титулата годинава“.

Прашан вчера во Шангај дали се согласува со тврдењето на Шпанецот, Шумахер одговори: „Да, навистина. Ако погледнете на бодовниот систем, ќе видите дека и на таквите како Алонсо, кој се откажа во Малезија, може да им се случи пех од какви и да е причини. И јас имав таков во Малезија, а во еден момент од сезоната тоа ќе погоди и некој од возачите што се борат за титулата. Според тоа, ако бидеме доволно брзи, нема причина да не се бориме за титулата. Пред нас е толку долга сезона, толку е рано, а знаеме и колку брза може да биде и стапката на развој. Има добар потенцијал за развој на овој болид, па нема причини да се мисли дека сезоната е готова за Нико или за мене“.

Седумкратниот светски шампион ги и отфрла критиките во печатот, инсистирајќи дека тој лично не е незадоволен со своите резултати.

„Тие не се толку добри како што некои очекуваа, па дури јас посакувам да имав подобри резултати, но конкуренцијата е силна. Природно е да ја немате истата позитивна повратна реакција во медиумите, но јас знам што правам, знам што се случува и немам причина да бидам разочаран. Се' уште се чувствувам многу среќен, а дали тоа им се допаѓа на луѓето или не, нивна работа“, вели Шумахер.