Секој пораз до пет гола разлика ќе биде успех?!

Селекторот Димовски реален пред дебито на ЕП за фудбалерки до 19 години

 Сашко Ѓ. Димовски

Освен што треба да се покажеме како добри домаќини, ќе треба да се задоволиме и со непретерани порази во мечевите на нашата репрезентација на претстојното Европско првенство за фудбалерки до 19 години што ќе се одржи во Македонија од 24 мај до 5 јуни.

„Не бегам од одговорноста, но ќе бидам задоволен од секој резултат што нема да биде претеран“, изјави селекторот Добре Димовски кој ќе ја предводи македонската селекција на ова ЕП 2010. Запрашан што е непретерано за него тој додаде: „За успех ќе го сметам секој резултат до 4 до 5 гола разлика“.

Македонија ја прифаќа аутсајдерската улога на шампионатот што ќе го организира. За нас нема лесен противник меѓу седумте состави (Англија, Шпанија, Франција, Италија, Шкотска, Германија, Холандија), кои ќе допатуваат во нашата земја, но Димовски и нашата најдобра фудбалерка, Наташа Андонова порачуваат дека нема однапред да се предадат иако се е на страната на противниците. Тоа не треба да се сфати дека се негуваат некакви илузии туку како обид, надеж и верување за скапо продавање на кожата. Прва причина за нашата аутсајдерска улога е големиот јаз во квалитет меѓу Македонија и учесниците, втора е начинот на работа на тренинзите, трета е нивниот интензитет и фондот и на крајот возраста на фудбалерките. Додека учесничките на ЕП 2010 ќе настапат со генерација која треба да игра, ние ќе играме со фудбалерки на возраст од 16 и 17 години. Со дел од репрезентациите на шампионатот имаме играно досега, но сме радувале на погодок и притоа поразите беа убедливи. Од Шпанија - 9:0, од Франција - 7:0, од Холандија 11:0, неодамна доживеавме дебакл и во Осло, од Норвешка, со 14:0.

„Како репрезентација сме свесни за разликата во квалитет меѓу нас и било која селекција што ќе настапи на ова европско првенство. За традицијата, за резултатите, за начинот на работа на тренинзите. Секојдневно тренираат по двапати, а кога се подготвуваат за вакви големи турнири и по трипати“, изјави нашата најдобра фудбалерка, Наташа Андонова, чие значење во нашиот состав селекторот Димовски го спореди со она на Горан Пандев во сениорската машка репрезентација.

„Нема лесни противници за нас, но кога би избирала би сакала да се најдеме во група со Италија, Шкотска и Шпанија“, дополни Андонова.

Седум дена пред првенството Македонија ќе се подготвува во Дојран каде што селекторот Димовски ќе ги има на располагање сите потенцијални репрезентативки. До стартот на ЕП ќе одиграме и четири контролни натпревари, два со Словенија и по еден со Белорусија и со Холандија.

Натпреварите на шампионатот ќе се играат на четири стадиони во два града. Три од нив се во Скопје („Железарница“, „Борис Трајковски“ и „Филип Втори“ и „Милано арена“ во Куманово. Осумте земји-учеснички на ова ЕП ќе бидат поделени во две групи на денешната ждрепка во малата сала во „Борис Трајковски“ во 18 часот во која извлекувањето ќе го извршат Андонова и една од легендите на македонскиот фудбал, Илија Најдоски.

Фудбалската федерација на Македонија (ФФМ) најавува дека е одлично подготвена за организација на настанот и очекува ЕП да придонесе за поголема популаризација на женскиот фудбал кај нас и негова поголема масовност во иднина.