Чикаго во плеј-офот, Кевин Дурант во историја

Со триумфот над Шарлот од 98:89 Чикаго го фати последниот воз за осмото место на Истокот

Чикаго булс до плеј-офот со Кливленд ги одведе Дерик Роуз со 27 поени и Јоаким Ноа и Тај Гибсон, кои против Шарлот запишаа дабл-дабл скор. Ноа постигна 21 поен и 13 скока, додека Гибсон оствари десет поени помалку. На другата страна најдобри беа Томас со 16, Валас со 15 и Џексон со 14 коша.

Покрај Чикаго, епитетот ��ерој на последната вечер го заработи сјајниот Кевин Дурант, кој не ја пропушти можноста уште еднаш да понтира со повеќе од 30 коша. Кошаркарот на Оклахома во триумфот над Мемфис (114:105) постигна 31 кош и својот фантастичен овосезонски просек го одржа на 30,1, што на 21-годишниот Дурант му ја донесе титулата најмлад најдобар стрелец во историјата на НБА-натпреварувањата. Тој го собори рекордот на 22-годишниот Макс Заслофски од далечната 1947/48.

Дурант, кој во овој меч ја немаше поддршката на Ненад Крстиќ, го остави зад себе „кралот“ Леброн Џејмс, која оваа сезона има просек од 29,7 поени.

Негативен рекорд израмни Минесота, која по средбата со Детроит и поразот од 103:98 ја завршија сезоната со катастрофален скор од 15-67.

Резултати: Атланта - Кливленд 99:83, Бостон - Милвоки 95:106, Далас - Сан Антонио 96:89, Хјустон - Њу Орлеанс 115:123, Мајами - Њу Џерси 94:86, Минесота - Детроит 98:103, Оралдо - Филаделфија 125:111, Оклахома - Мемфис 114:105, Вашингтон - Индијана 98:97, Торонто - Њујорк 131:113, Шарлот - Чикаго 89:98, Л.А. Клиперс - Л.А. Лејкерс 107:91, Портланд - Голден стејт 116:122, Јута - Феникс 86:100.

Плеј-оф, прва рунда:

Запад: Л.А. Лејкерс - Оклахома, Далас - Сан Антонио, Феникс - Портланд, Денвер - Јута.

Исток: Кливленд - Чикаго, Орландо - Шарлот, Атланта - Милвоки, Бостон - Мајами.