Британската влада ќе ја приватизира банката Нордерн Рок
Лондон- Британската влада соопшти дека одново ќе ја приватизира национализираната банка Нордерн Рок, во обидот да се спречи таа одново да се најде во ситуација да бара помош за спасување или да „плива“ на пазарот за акции.
Банката што, главно, беше ориентирана на поддршка на пазарот за недвижен имот, куќи и станови, во 2007 година се најде на работ од банкротство и ликвидација, па тогашната влада на премиерот Гордон Браун одлучи таа да биде целосно национализирана. Ваквиот начин за спасување беше избран за да не се наруши банкарскиот систем, како и за да се зачуваат штедните влогови на Британците во оваа банка.
Сегашниот министер за финансии, Џорџ Озборн, го објасни планот за приватизација на банката Нордерн рок како почеток на „враќање на парите“ што државата ги даде за спасување на банкарскиот систем на Велика Британија, кога по крахот на оваа банка со банкротство се соочија уште неколку големи банки во земјата, погодени со „кредитниот удар“ што го погоди банкарството на западниот свет.
За приватизирањето, најверојатно, ќе се побара една милијарда фунти, а како претенденти за откуп на банката Нордерн рок се сметаат две домашни финансиски компании, кои и во време на избувнувањето на кризата, бараа да ја преземат банката.
Најавата на владата за средување на банкарскиот систем во Велика Британија доаѓа по предупредувањето на гувернерот на Банката на Англија, Мервин Кинг, дека домашната економија се соочува со уште три „посни години“, што ќе завршат дури во 2014 година, а не в година, како што тоа планира и навестува коалиционата влада на Дејвид Камерон.
Потребни се дополнителни три години за излекување на „болната британска економија“ пред таа да се врати во годините на изобилието, кои траеја седум години, до почетокот на кризата во 2007 година. (МИА)
|
