Со откуп на пченица за државата, ќе се брани нејзината цена
„Владата ќе почне со надополнување на стоковните резерви пченица за да се спречи евентуален драстичен пад на цената на лебното жито“, изјави вицепремиерот за економски прашања, Владимир Пешевски, по вчерашната средба на владиниот тим со претставници на земјоделските здруженија.
Како што информира Пешевски, Владата е подготвена, доколку има потреба, и оваа година да ги заштити земјоделците со повторно воведување на мерката што ги обврзува преработувачите да купат одредена количина домашна пченица, ако сакаат да увезат брашно или жито.
„Дијалогот меѓу Бизнис-заедницата, земјоделците и Владата продолжува. Сите отворени прашања и натаму ќе се решаваат со истата динамика како досега“, нагласи Пешевски.
Земјоделците се задоволни. „Од субвенциите што ги добиваме и од поддршката што ќе се реализира, допрва Македонија ќе се ослободи од увозот на пченица, а во догледно време ќе почне и да извезува“, рече претседателот на Сојузот на земјоделците, Вељо Тантаров. Според него, цената на пченицата годинава се очекува да биде најмалку 15 денари за килограм.
На работната средба во Владата станало збор и за состојбата во лозарството, како и за програмата за рурален развој, која е предвидено да се прошири со дополнителни финансиски средства за набавка на комбајни и поголеми трактори. (МИА) |
