Македонија Ѓ.П. бара 3.300 евра од Вардар за скршените столчиња
Навивачите на Вардар, популарните „Комити“, дивееја по натпреварот со Македонија во Ѓорче Петров, на кој нивните миленици беа поразени со 1:0, кршејќи дури 75 столчиња на трибината. Тие се поставени пред десетина дена, а едно столче со монтажа чини 2.250 денари. Раководството на Македонија ЃП за ова му достави фактура на Вардар во износ од 199.000 денари или околу 3.300 евра.
„Ако не платат, ќе бидеме принудени да покренеме дисциплинска пријава во Фудбалската федерација на Македонија, бидејќи ова не е првпат навивачите на Вардар така да се однесуваат во Ѓорче Петров. Пред две години искршија 15 столчиња, кои до ден денес не ни се платени“, изјави директорот на клубот Серафим Димовски.
Лани навивачите на Шкендија ХБ од Тетово, исто така, направија штета на трибините во Ѓорче Петров, кога искршија 40 столчиња, но раководството на тогашниот тетовски прволигаш веднаш ја плати штетата. (М. М.)
|
