Претходен број

На прва топка

Скокалница и лет во место

 Фарко Шакири

Цивилизациската битка против мрачните гравитациски сили е добиена пред стотина години. Летовите на хеликоптерите, авионите, балоните, едрилиците, змејовите го означија крајот на човечките напори, тој конечно да се одвои од постојаното чмаење на земјата. Потфат што не му успеа ниту на легендарниот митски летач Икар со сите негови варијанти на крилја.

Горенаведените летала се забележуваат и во Македонија, но очигледно кај неа се чувствува страв од летање (барем кај оние кои треба да докажат дека и сонцето е ѕвезда) веројатно од безбедносен аспект, посигурно е да стоиш на земја и во место, отколку да леташ, но чувството во овој случај не е автентично, туку станува збор за отпор кон нешто.

Сепак, информацијата што проструи низ јавноста, а која вели дека по иницијатива на неуморната Агенција за млади и спорт некаде во Македонија ќе се гради ски-скокалница, влева надеж дека тој страв од летање ќе го надминеме летајќи на скии. Проектот не е скап, само 5 милиони евра буџетски, поточно речено наши пари, ќе не' стават во редот на нациите кои веќе одамна летаат на овој начин и ги освојуваат дестинациите кои живот значат, и сето тоа на чифт штици.

Значи, по 10 базени, 40 сали, 100 тениски терени, дојдовме и до скокалница. Останува уште стадион за бејзбол со капацитет 100.000 места и терен за голф кој би бил на локација некаде меѓу преспанските села Горно и Долно Дупени, со оглед дека Прспанското Езеро е на најкритичната точка од своето постоење, па ударите на Тајгер Вудс и другите лесно може да го прелетаат, а ние ќе го задоволиме критериумот и за водена површина во тој голф-амбиент.

А, за скокалницата што би требало да се изгради на Кожуф, веднаш треба да аплицираме за прием во друштвото на турнејата „Четири новогодишни скокалници“. Ем е нова година, што значи многу празници, храна и малигани, ем плева од туристи, состојба во која многу полесно и похрабро се лета.

Меѓутоа, таквата новогодишна олабавеност на падините на Кожуф крие и опасност. Имено, поради близината лесно може да се случи некој наш летач да го наруши воздушниот простор на Грција, што дополнително ��е ја

искомплицира и така тешката преговарачка позиција околу името со нашиот јужен сосед.

Затоа, воопшто не треба да се чека со распишувањето на тендерот за изградбата на македонската „Планица“, кој ќе биде и прв чекор во остварувањето на замислата за организација на Зимски олимписки игри во Македонија. А, граѓаните како даночни обврзници за своите пари ќе може бесплатно да летаат и да уживаат во убавините на Кожуф и околината. За тоа ќе треба да размисли и градоначалникот на Кисела Вода, Џорџе Арсов, и да изнајде место за биста на Мати Никенен, како еден од најдобрите светски летачи, кој поради премногу блискиот и секојдневен контакт со финската вотка прерано ја заврши кариерата.