Борисов разреши 45 топ-дипломати

СОФИЈА - Бугарскиот премиер Бојко Борисов вчера побара разрешување на 45 дипломати идентификувани од историската комисија дека биле агенти на тајната полиција во време на комунизмот пред 1990 година. Комисијата соопшти дека меѓу дипломатите се сегашните амбасадори во Лондон, Берлин, Рим, Токио и во Москва кои соработувале со поранешната Државна безбедност, кога балканската држава беше советски сателит. Половина од бугарските амбасадори во земјите-членки на ЕУ, вклучувајќи ги Шпанија, Холандија, Шведска, Грција и Португалија, биле агенти, според комисијата, која има задача да ги отвори архивите на поранешната тајна полиција. Бугарија, членка на ЕУ и на НАТО, е меѓу последните што се справува со своето болно комунистичко минато. (Ројтерс)