Стотина повредени во судирите во Рим

Судирите меѓу демонстрантите и полицијата во Рим избија откако владата на премиерот Берлускони „го преживеа“ гласањето за доверба

Рим - Околу 100 луѓе се повредени во завчерашните судири меѓу демонстрантите и полицијата во Рим, што избија откако владата на премиерот Силвио Берлускони „го преживеа“ гласањето за доверба во парламентот.

Повеќе илјади демонстранти вчера на улиците околу парламентот фрлаа петарди, камења и димни бомби, палеа автомобили и контејнери, кршеа излози на продавниците и се судрија со полицијата, која употреби палки и солзавец.

Од повредените лица 57 се полицајци, а приведени се околу 40 демонстранти. Поради повреди се хоспитализирани 24 лица.

На вчерашниот масовен протест во Рим, според организаторите, учествувале 100.000 луѓе, а голем број од нив беа донесени со 80 автобуси од внатрешноста на земјата. Протести имаше и во другите италијански градови.

Во Италија повеќе недели траат протестите поради владините мерки за штедење и планираните реформи во образованието.