„Роса“ останува на врвиците на традицијата

Здружената македонска фолк-естрада, по игра на случајот, во петокот на 26 ноември беше ставена во ситуација да ја тестира својата моќ врз публиката, наспроти Цеца. И со сите сили некако си ја одбрани честа, полнејќи ја Универзална на 12. издание на Фолк-фест „Роса“. Фестивалот, по традиција ревијален, не остави простор за сплетки и игри за награди, па македонската фолк-естрада требаше само да се покаже во сиот свој сјај и стајлинг, секако според можностите. Дали песните што беа испеани од: Руса Андова, Дејан Димишков, Оливер Милошевски, Спасе Сиљановски, Ирена Вељовска, Весна Диндева, групата „Т’га за југ“, Кристина Трајанова и групата „Крешчендо“, Благица Николова, Јордан Митев, Дарко Стојановски, Андријана Андреевска, Миле Кузмановски, Милица Кузмановска, Марјан Коцев и „Дрим тим“, Анета Наковска и „Витрус“, Анастасија Петреска, Гоце Арнаудов, Благица Калева и „Модус“, Јасмина Гуњова, Влатко Миладиновски, групата „Џумбуш“ и Елена Велевска ќе остават некаква трага, ќе слушнеме најрано идната година.

Годинава на „Роса“, впрочем, како и секогаш имаше награди само за животно дело, а со нив беа почестени: Миле Барбаровски, Љупчо Трајковски-Фис и Милан Завков.

Во услови кога вербата во македонскиот фолк е како давеник за сламка, опстојувањето на „Роса“ се доживува како „опстојување на врвиците на традицијата“. (Ј.П.)