БОРБА ПРОТИВ СИДА

Познатите ги згаснуваат своите дигитални профили

Лејди Гага, Џастин Тимберлејк, Ашер, Алиша Кис, Ким Кардашијан... се само некои од познатите личности, кои утре, на 1 декември, симболично ќе ги згаснат своите профили на социјалните мрежи, како што се „Фејсбук“ и „Твитер“, за да и' се придружат на хуманитарната акција за подигнување на свеста во борбата против сидата. Многу познати спортиски, музичари и актери се одлучија да и' се придружат на хуманитарната акција на 1 декември, кога се одбележува Меѓународниот ден на борба против сидата.

Алиша Кис прва ја покренала акцијата на еден ден да ги згасне сите свои профили на популарните социјални мрежи и така да укаже на се' поголемиот број заболени од вирусот ХИВ низ светот. Нејзиниот предлог го прифатиле многубројни колеги и сега во оваа акција учествуваат Лејди Гага, Џенифер Хадсон, Серена Вилијамс и Џастин Тимберлејк. Сите тие ќе снимат и рекламен спот каде што лежат во сандаци, што ја претставува нивната дигитална смрт.

„Многу е важно да ги шокираме луѓето и едноставно со тоа да ги разбудиме. Се разбира, не е вистина дека на луѓето не им е грижа за другите и дека не сакаат ништо да направат. Работата е во тоа што тие и не мислат на болеста“, објаснила Алиша Кис.