Брисел ќе ја суспендира Албанија?

Tирана - Пратеничката група на албанските опозициски социјалисти денес треба да одлучи дали ќе се врати во парламентот што го бојкотира со месеци, како резултат на големиот притисок на меѓународниот фактор, а особено на ЕУ, која, меѓудругото, се закани дека ако нема враќање на нормалата - ќе го суспендира процесот на евроинтеграција на земјата. .

Социјалистите, по јунските парламентарни избори, влегоа во с��браниската сала само на почетокот на март годинава, кога дадоа заклетва и излегоа. Со тоа тие си ги заштитија пратеничките мандати и платата, но ја парализираа работата на законодавното тело.

Парламентот го бојкотираат поради неисполнување на барањето од страна на актуелните власти да спроведат истрага на изборите и да ги отворат гласачките кутии, зашто став на опозиционите социјалисти е дека изборните резултати се фалсификувани. Минатата недела албанскиот премиер Сали Бериша и главниот опозиционен лидер Еди Рама имаа средба со лидерите на народните и социјалистичките партии во ЕП, кои се понудија да посредуваат, за да се спречи земјата да потоне во политички хаос или ЕУ да ја спроведе заканата. Истовремено еврокомесарот Штефан Фуле со остар јазик ја предупреди официјална Тирана дека пролонгираната политичка нестабилност ќе му наштети на процесот на евроинтеграција на земјата.

Социјалистичката опозициона партија контролира речиси половина од местата во парламентот и ги бојкотира седниците со месеци држејки ги со тоа како заложник законите што ги бара ЕУ. Околу 200 членови на Социјалистичката партија и нејзини 22 членови на парламентот почнаа и штрајк со глад, што ги натера лидерите на ЕП да изјават дека ќе го суспендираат процесот на евроинтеграција на земјата, нешто што не се случило во историјата на Унијата. Албанија во моментов е подалеку од Македонија, бидејќи нема кандидатски статус во ЕУ, но поблиску од другите балкански земји зашто ја помина процедурата со прашалникот и чека одлука на Брисел, која никако да дојде. (Н.Р.)