Американците ги превоспитуваат талибанците

Талибанците се ослободуваат од затвор на чесен збор дека нема повторно да борат

МИЈАН ПОШТЕХ - Млад талибански затвореник со превез на очите беше седнат меѓу 17 старешини од селото кога му ги открија очите и тој се соочи со главниот обвинител, кој му мавташе со документ на кој ги имаше потписите на старешините или отпечаток од прст. Капетанот Скот Куомо, командант на американските маринци, во функцијата на обвинител му рече на затвореникот: „Овој документ е изјава дадена под заклетва од сите старешини дека тие гарантираат за тебе и оти никогаш повеќе нема да ги поддржуваш талибанците или да се бориш за нив“. По получасовното судење капетанот ја презентираше пресудата од групата пред тивкиот затвореник Џума Кан (23), кој маринците го заробија откако пронајдоа направа за активирање на експлозив, муниција и опиум закопани во неговиот двор. Таткото и дедото на Кан, кој беше еден од старешините, беа дел од групата. „Во име на мирот, вашето семејство, вашиот дедо“, рече капетанот Куомо со сериозен глас, „ние ќе те ослободиме“.

Вака беше поделена правдата една саботна вечер, длабоко во талибанската внатрешност во долината на реката Хелманд, каде теоријата што стои зад американските напори за „реинтеграција“ на непријателите се соочува со двосмислената реалност по речиси еднодецениската војна. Капетанот Куомо ги призна опасностите од судењето и другите настани како овој, кои се одвиваат во Авганистан. „Дали со сигурност знам дека Џума Кан нема повторно да им се придружи на талибанците?“, вели тој. „Не“. И покрај тоа се продолжува со оваа практика.

Шест дена по ослободувањето на Кан, еден друг капетан, Џејсон Брезлер, доби ветување од 25 поранешни бунтовници дека ќе се пријават како полицајци во едно село на северот. Една недела подоцна во Марџа, каде продолжуваат судирите меѓу маринците и талибанците и покрај американската офанзива во регионот во февруари, потполковникот Брајан Крисмас ослободи две момчиња, кои признаа дека се бореле за талибанците откако тие двајца и други двајца старешини потпишаа изјави со кои ветуваат дека момчињата нема повторно да се борат. Дејствувајќи според воените правила кои имаат за цел да се убедат пониските ешалони на борци да го положат оружјето, командантите ја повторуваат мантрата дека САД никогаш нема со убиства да си го трасираат патот кон победата во Авганистан.

Официјални претставници на армијата ја опишуваат досегашната реинтеграција како во најдобра рака спорадична. Минатата година како дел од претходните напори на земјата да им се даде работа на дезертираните талибанци, властите во Кабул соопштија дека најмалку 9.000 бунтовници го предале оружјето. Авганистанските власти сега проценуваат дека има 40.000 борци кои треба да се реинтегрираат во заедницата, околу 1.000 од самиот врв, вклучувајќи го и талибанскиот лидер Мула Мухамад Омар како еден од најзначајните. Официјал��и претставници на американската армија посочија дека немаат јасна претстава за тоа колкав број талибанци досега се реинтегрирани во општеството, вклучувајќи ги и оние што беа реинтегрирани за време на првите години од војната, меѓутоа посочуваат дека тие бројки се мали.