Елисејските полиња станаа село

Од нашиот дописник
Тони Гламчевски

Париз - Осум илјади парцели земја, секоја тешка околу 300 килограми и околу 18.000 квадратни метри патека од деланки од црвено дрво поставени во должина од 1,2 километри ја претворија најубавата авенија во светот, Елисејските полиња, во вистински полиња со голема разноликост. Операцијата „Природата престолнина“, организирана од француските млади земјоделци ја реализираа за само 24 часа околу двесте камиони, стотина дигалки, околу 600 млади земјоделци, 150 шумари, како и стотина техничари. Главниот предизвик беше со голема точност да се инсталира секоја парцела на вистинското место. Буџетот на манифестацијата е околу 4,2 милиони евра и таа сигурно ќе остане запаметена како големата жетва од пред 20 години организирана, исто така, на Елисејските полиња, од младите француски земјоделци, кои тогаш под Триумфалната порта донесоа комбајни.

Во текот на неделата и понеделникот Елисејските полиња беа затворени за автомобилскиот сообраќај. Парижани и бројни странски туристи од плоштадот „Етоал - Шарл де Гол“ до кружната раскрсница на Елисејската авенија можеа бесплатно да се прошетаат низ вистински реконструирани полиња, да гледаат бројни видови цвеќиња, растенија и дрва. На Елисејските полиња беа претставени 80 отсто од земјоделското производство на Франција и бројни видови дрва што растат во француските шуми. Тука имаше и по некое прасе, пчели, овци и други домашни животни на големо задоволство на младата публика.

Операцијата на прв поглед изгледа како напразно трошење на пари, но таа е многу поефикасна и поевтина од која било медиумска кампања. Младите француските земјоделци покрај реконстуираните парцели на парижаните и странските туристи им ги објаснуваа растенијата и нивната употреба или корист за човекот. Манифестацијата беше организирана, со цел да се запознае пошироката јавност со нивната професија, често непозната и во моментов тешко погодена од економската криза.

Тешко е да се процени колку луѓе се најдоа изминативе два дена на Елисејските полиња. Влезот беше бесплатен, времето со летни температури и сонце, па според некои процени бројката од две убавини сигурно беше достигната за два дена.