Шпигел: Малите земји да си одат од еврозоната

Во интервјуто за „Дер шпигел“ поранешниот претседател на Бундесбанк, Карл Ото Пол, изјави: „Еврото не е во опасност, меѓутоа, некои од помалите земји треба да ја напуштат единствената валута“. Тој додаде дека неодамнешниот план за спас изврши предавство на некои суштински принципи негувани во ЕУ-договорите. „Темелите на еврото фундаментално се сменија како резултат на одлуката од владите од земјите во еврозоната да се трансформираат себеси во трансфер-унија. Ова е прекршување на секое правило. Во договорите што се однесуваат на функционирање на Европската унија експлицитно се наведува дека ниту една земја не е одговорна за долговите на друга. Меѓутоа, она што сега го правиме е токму тоа. Како дополнување на ова е и фактот дека наспроти сите ветувања и наспроти експлицитната забрана во рамките на нејзиниот устав, Европската централна банка е инволвирана во финансирање на држави. Очигледно сето тоа ќе има реперкусии“, предупреди тој. Пол, исто така, ги оспори тврдењата на германските власти дека „нема алтернатива“ за спас, велејќи: „Секако дека има алтернативи. Пред се', никогаш да не и' се дозволеше на Грција да стане дел до еврозоната“.

Во меѓувреме, во интервјуто за „Ел паис“ грчкиот премиер Јоргос Папандреу ги отфрли сугестиите дека беше грешка тоа што на Грција и' се дозволи да стане дел од еврозоната. Тој рече: „На Комисијата и' се доставуваа шест години неточни податоци. Всушност, дел од одговорноста ја има Грција, меѓутоа, еврозоната, исто така, нема доволно механизми да го открие тоа “.