ЕДИТОРИЈАЛ

Кој ќе ги врати парите?

Светлана Унковска

Ниту една злоупотреба, малверзација или уште помалку непочитување на законите не може, а и не смее да биде покриена со наводно покажување на некаква добра волја од самите прекршувачи. Во примерот на функционерите на владејачката ВМРО-ДПМНЕ, кои најавија дека ќе се откажат од една или од неколкуте функции, кои одеднаш ги извршуваат, некој ќе рече „па колку о��ие функционери се совесни затоа што кога им беше забележано веднаш потрчаа и во редици чекаа да си поднесат оставки. А воедно се откажаа и од дополнителните приходи“. Во најмала мера така некако владејачката партија очекува да се доживее информацијата што стигна од нивните редовите кога велат дека функционерите доаѓале во групи и си поднесувале оставки. Па ако толку масовно се поднесувале оставките на двојните функции, на кои, како што велат, не им го знаат ни бројот, тоа значи дека дека оние што ги кршеле законите не можат да се добројат.

Во неколку закони, и тоа во Законот за спречување на корупцијата, за судир на надлежности, за локална самоуправа, како и на Изборниот законик, јасно е наведено дека е забрането еден функционер во исто време да биде поставен на неколку функции. И наместо истите тие функционери да бидат повикани на одговорност за кршење на законите, тие сега се претставуваат како великодушници, кои послушно ги извршуваат наредбите на партискиот комитет и се откажуваат од некоја од расположливите фотелји. И сето тоа откако претходно го игнорираа повикот на првиот антикорупционер, Илми Селами, кој поименично ги повикуваше некои од двојните функционери да се откажат од една фотелја, а со тоа и од уште една плата. А, на антикорупционерот, се чини, му останува само јавно да повикува, но функционерите, секако, одбираат да го послушаат партискиот налог. ВМРО-ДПМНЕ одамна веќе е над законите и над институциите на државата. Таа дели правда и функции според партиски заслуги, таа укинува.

Прашање е и дали владејачката партија ќе остане на оставките на оние што беа јавно прозвани или докрај ќе го прочисти незаконието во своите редови. Затоа што тоа не е само во престижните директориски фотелји на МЕПСО, на Агенцијата за станбен и деловен простор или во Градската болница, туку широко ги опфаќа функционерските фотелји.

Но, овој проблем има две тежини. Едниот е што се има двојни аршини за функционерите во однос на (не)почитувањето на законите, затоа што. исто така, е непознатост дали некој ќе одговара за ова, а вториот е во прашањето со платите, кои досега незаконски ги примале. Затоа што ако е незаконска функцијата, практично, незаконски се примала и платата. Голем дел од нив ќе го искористат дури и крајниот рок, 31 август, што им го поставија од партијата за да можат да ја искористат и августовската двојна плата.

Дали за дуплото земање пари некој во државава воопшто ќе одговара или повторно никој од нив нема да се чувствува виновен што неколку години им било дозволено да земаат по неколку плати? Кој од локалниот, кој од државниот буџет, се примаат пари немерени. Во ова време на невработеност или вработеност без плата, голем дел од коментарите во јавноста се токму со прашањето - кој ќе ги врати парите?

Оттука, владејачката ВМРО-ДПМНЕ не може толку наивно да излегува со тоа дека донела цврста одлука да ја послуша јавноста и со тоа да и' ги замачка очите дека постапува според законите на државава. Театарот под маски веќе никој не сака да го гледа, туку во оваа трагедија, сепак, некој мора да ја понесе одговорноста за ваквото неодговорното однесување.

И една мала дигресија - толку ли имаме способни функционери што истовремено можат успешно и квалитетно да работат на неколку работни места?