ДУИ плаши кокошки на погрешно место

Лидерот на ДПА, Мендух Тачи, во интервју за телевизија Алб ги отфрла обвинувањата дека објавените досиеја за некои челници на ДУИ се фабрикувани од неговата партија. Според Тачи, таквите обвинувања се резултат на паника во партијата на Али Ахмети и имаат цел да ја дезориентираат јавноста.

„Тие се во една состојба на паника и ги плашат кокошките таму каде што ги нема. Тие најдобро знаат што направиле. Прво, ова не се досиеја, туку извадени делови од досиеја на луѓе што биле следени“, вели Тачи. Тој смета дека многу брзо ќе излезат на виделина силни аргументи за „антинационалното дејствување на некои од челниците на ДУИ“.

„Сте го слушнале и водачот на ДУИ, кој директно не кажува дека ова го направиле ДПА и Мендух Тачи. Јавно го повикувам да го каже тоа, но не го кажува затоа што знае дека ќе се соочи со суд“, вели Тачи.

На прашањето што мисли околу вистинитоста на податоците што се прикажани во документите, лидерот на ДПА одговара дека такво прашање му поставиле многу претставници на меѓународната заедница, но оти тој од стручен аспект не ја познава оваа проблематика. Сепак, ја повикува ДУИ „да ја ампутира таа рана што крвави“, бидејќи „ако не ја ампутираат ќе умре целиот тој политички организам“.

Прашан дали мисли дека прашањето на досиејата може да влијае и на Косово, Тачи одговара: „Ние сме еден народ. Сме имале еден непријател. Работите се поврзани. Но, за да го смирам господин Красниќи и да му ги отворам очите дека многу греши, само го потсетив на изјавите на претседателот Ругова во 1993 година за да бидат внимателни“. (П.Р.)