СДСМ препозна признавање кај министерката

Во тврдењата на министерката за култура дека нема исчезнати документи од проектот „Скопје 2014“, СДСМ вчера препозна нејзино признавање. Игор Ивановски, член на партискиот Извршен одбор, убеден е дека Елизабета Канческа-Милевска направила обид да се извади од мегааферата „патриотска метла“ со исчезнување документација за поништени тендери што не се однесуваат на „Скопје 2014“. Тој констатираа конфузност кај министерката и и' порача да се видат на суд.

„Ова се ноторни лаги и скандалозни тези. Кој Ви дава право со таква ароганција да тврдите дека нема ништо спорно затоа што се работело за документи од поништени тендери? На јавноста и' е многу добро познато дека еден од методите за криминал и корупција и местење на тендерите, претставува нивното поништување. Вообичаена практика за оваа власт е по поништувањето да се склучува непосредна спогодба во четири очи со однапред познат изведувач. Токму затоа мора да ја чувате и документацијата за сите евентуално поништени тендери“, потенцираше Ивановски обраќајќи се до министерката за култура. Од СДСМ го проширија списокот на исчезнати документи, меѓу кои се најдоа и оние за стариот театар. (Сн.К.)