Министрите на ДУИ на дневен ред во септември?
Врвот на партијата на итна седница разговарал за потресите во Владата
Светлана Унковска
Министрите на ДУИ засега остануваат во своите функционерски фотелји, бидејќи партиските органи се' уште го преиспитувале работењето на нивните кадри, велат од партијата на Али Ахмети. Сепак, проветрување во редовите на интегративците ќе има и, како што и претходно се најавуваше, тајмингот останува за септември. Партиските извори на ДУИ тврдат дека со приближувањето на датумот за кадровските смени, се вжештува и онака напнатата атмосфера, при што веќе подолг период владее големо незадоволство.
Лидерот на ДУИ, Ахмети, завчеравечер откако се случи бранот оставки, итно го свикал партиското претседателство на кое било разговарано за смените во ресорите на коалициониот партнер. Истовремено, било утврдено и дека реконструкцијата на министрите на ДУИ треба да се остави за подоцна. Под лупа се ставени работењата на министрите за труд и социјална политика, Џелал Бајрами, за екологија, Неџати Јакупи, како и за локална самоуправа, Муса Џафери. Со смената на овие тројца министри од нивните редови би бил надминат квантумот од седуммина сменети министри по што премиерот нема да може да направи реконструкција, туку ќе мора да го врати мандатот.
„Нема да има смена на министри од ДУИ, затоа што во партијата се' уште не сме ја заокружиле конечната анализа на сработеното. Го почитуваме ставот на претседателот на ВМРО-ДПМНЕ, наедно и на премиер и тоа е нивен внатрепартиски проблем и, се разбира, ќе го поддржиме. За смените во ДУИ ќе разберете по ставовите на Централното претседателство и Генералното собрание на партијата“, изјави вчера пратеникот Џеват Адеми, но не прецизираше кога е можно да бидат донесени конечните одлуки. Тој потенцира дека неговата партија ги носи самостојно ставовите и дека премиерот Никола Груевски не барал смена на некој министер од коалициониот партнер.
„Досегашните процени се позитивни и досега Груевски не побарал смена од нашите министри. Со премиерот имаме разговори и за работата на министрите на ВМРО-ДПМНЕ и за сите министри“, рече Адеми, кој на прашањето како ја оценува работата на министрите на ДУИ, рече дека „тие не се на дневен ред“.
И покрај тоа што се вели дека со министерските смени биле изненадени и самите интегративци, сепак, Адеми вели дека за ваквите потези биле навреме информирани и тоа во сите фази на донесувањето на одлуките. Тој, исто така, вели и дека премиерот се консултирал со нив околу предлозите за новите министри.
„Штом ги поддржуваме, значи разговори имало, а за деталите знаат само Груевски и Ахмети“, рече Адеми. |
