Претходен број

Четврти грабеж на банкарски пари за три месеци, полицијата само гледа

Од Уни банка во Кисела Вода се украдени 3.400 евра и 120.000 денари

Горан Адамовски

Полицијата трага по вооружениот разбојник, кој завчера ја ограби експозитурата на Уни банка во скопската населба Кисела Вода. Утврдено е дека разбојникот одзел околу 3.400 евра и 120.000 денари. Како што објавивме, во средата околу 15 часот непознат маж влегол во експозитурата на банката на „Чешма“ во Кисела Вода, под закана со пиштол ги принудил службеничките да му ги дадат парите, по што побегнал. Според очевидци, разбојникот побегнал со мотоцикл.

Во период од деведесетина дена ова е четврти голем грабеж на банкарски пари. Украдени беа десетици илјади евра, а заедничко за сите нив е што ограбувачите се' уште се на сигурно. Полицијата не успеа да разреши ниту едно разбојништво.

Денеска изминуваат точно три месеци од спектакуларниот грабеж на Прокредит банка во строгиот центар на Скопје. Неколкучлена група влезе во банката, одзеде 50.000 евра и стрелаше во се' што им се најде на патот додека излегуваа. Ранија двајца полицајци, а ги доведоа во опасност и животите на стотици граѓани. Со два автомобила без проблем успеаја да побегнат надвор од градот. Полицијата никаде не им постави барикади, па разбојниците најверојатно побегнаа во Косово. Пронајдените автомобили, дел од оружјето и празните вреќи со пари, како и апсењето на јатаците на разбојничката група е мала утеха за неуспешната истрага на МВР и на нивните косовски колеги.

Пред неколку седмици двајца разбојници ја ограбија Уни банка во ТЦ „Мавровка“. Според истрагата, невооружени разбојници под закана успеале да одземат околу 15.000 евра, а потоа побегнаа пред носот на полиција. Голем број „алфи“ спроведоа филмски претрес во „адвокатската“ уличка, но не најдоа ништо, освен што ги преплашија граѓаните.

Непознати се и разбојниците што пред десет дена во близина на Скопје ограбија три вреќи со пари од комбе што пренесувало пари и вредносни пратки на Охридска банка. Банката одлучи да не соопштува колку пари биле украдени. Филмскиот грабеж се случи на автопатот Петровец-Скопје, кога непознато лице му сугерирало на комбето да запре. Двајцата обезбедувачи, го запреле комбето, веројатно мислејќи дека станува збор за полицаец. Според очевидци, веднаш потоа до нив се паркирало сино возило, од кое излегле двајца вооружени мажи. Им го зеле оружјето и вреќите со пари.