Обама попопуларен во Европа, отколку во САД

Муслиманите се разочарани од американскиот претседател

Вашингтон - Американскиот претседател Барак Обама е попопуларен во Западна Европа и во Азија, отколку во САД, а муслиманите се разочарани од него, покажа годишното истражување на институтот  „Пју рисрч центар“.

Според анкетата, спроведена во 22 држави, не помалку од 90 проценти имаат доверба во Обама во поголема или помала мера. Тоа важи за 87 проценти од Французите и 84 проценти од Британците, но само за 65 проценти од Американците.

Седумнаесет месеци откако Обама ја презеде претседателската функција, тој продолжува да ужива висока доверба во Азија, 76 проценти во Јапонија, 75 проценти во Јужна Кореја, 73 проценти во Индија  и 67 проценти во Индонезија.

Рејтингот на првиот афроамерикански претседател во историјата на САД е висок во двете африкански држави вклучени во истражувањето, Нигерија со 84 проценти и 95 проценти во Кенија, родната земја на неговиот татко.

Во споредба со тоа, највисока е недовербата кон Обама во муслиманскиот свет. Неповолно мислење за американскиот претседател имаат 65 проценти од Турците, 64 проценти од Јорданците, 60 проценти од Пакистанците и 59 проценти од Египќаните, од кои сите исламски држави сојузнички на САД.

Единствен исклучок од муслиманскиот свет е Индонезија, каде што Обама поминува дел од своето детство.

Популарноста на американскиот претседател во исламските земји се намали во 2009 година кога тој во својот говор во Каиро објави нов почеток меѓу САД и муслиманскиот свет.

Карактеристично е и намалувањето на рејтингот на Обама во Мексико. Овој тренд се објаснува со новиот построг закон за емиграција во државата Аризона, иако тој се спротистави на неговото усвојување. Пред влегувањето во сила на овој акт, 47 проценти од Мексиканците имаа доверба во Обама, а сега нивниот дел е намален на 36 проценти.