Ибрахимовиќ: Пријатели од Интер, се гледаме во финалето од ЛШ
Трансферот на Швеѓанецот вреди 100 милиони евра и е поголем од оној на Роналдо и на Кака
Шведскиот напаѓач Златан Ибрахимовиќ се огласи преку шведските весници, паралелно со напуштањето на кампот на Интер во САД. Шпанските медиуми објавија дека преговорите со Барселона се речиси завршени и ништо чудно уште денеска Каталонците официјално да објават дека Ибра е нивниот нов напаѓач.
„Пријатели се гледаме во финалето од Лигата на шампионите“, им порача Ибра на своите досегашни соиграчи. Тој најпрвин треба да допатува во своето Малме, а потоа ќе замине за Барселона. Со оглед на последната изјава, искусниот центарфор веќе се однесува како играч на Барселона. И не залудно, затоа што и директорот на Барселона Бегиристајн потврди дека договорени се сите детали. „Доаѓањето на Ибрахимовиќ е само формалност“, вели директорот.
Иако, Барса кажа дека трансферот на Ето во Интер и овој на Ибрахимовиќ во Барселона е одвоена работа, сепак, медиумите повторно пишуваат дека во Милано ќе оди и Хлеб како позајмен играч на една година и плус 48 милиони евра.
Според тренерот на Интер Жозе Мурињо овој трансфер го надминал оној на Кака и Роналдо. „Само глупав тренер не би го сакал Ето во тимот и само глупав тренер би бил среќен да го загуби Ибрахимовиќ. Јас сум многу среќен што го добив Ето. Мислев дека Ибра ќе остане бидејќи верував дека само Реал М. е доволно луд да посегне по него, но испадна дека тоа е Барселона. На крајот мислам дека трансферот е извонреден. Вреди 100 милиони евра и тоа е најголемиот трансфер ова лето. За мене овој трансфер е навистина вреден затоа што Ето е вреден исто колку и Ибрахимовиќ“, објасни Португалецот.
Пораз на Милан, забиЈа Дрогба и Жирков
Милан загуби во пријателскиот меч во Балтиморт од Челзи со 1:2, а победничкиот гол во 69 минута го заби новото засилување за лондончаните Јури Жирков. Челзи поведе со голот на Дрогба во седмата минута, а израмни Сидорф во 38 минута. Ова е трет меч на Милан на турнејата во САД во кој не оствари победа. Во првиот меч одигра нерешено со Л.А Галакси, а во вториот загуби од мексиканската Америка, со која треба да игра и Челзи.
Тренерот на Челзи Карло Анчелоти очекува победа и во овој меч. „Целата турнеја е фантастична. Американците направија добра атмосфера. Жирков е изненадување за мене. Само што стигна и има потешкотии на теренот, што е нормално, но и во една таква ситуација постигна гол“, вели Анчелоти, кој полека го учи и англискиот јазик. „Се трудам по цел ден да зборувам англ��ски и мислам дека ми оди добро. Се навикнувам и на англиската храна. Сакам ростбиф, а особено ми се допаѓа англискиот доручек. Во Италија обично пиеме кафе и јадеме кифла. Еднаш добив и јоркширски пудинг и многу ми се допадна. Јас можам да јадам, но не и играчите. Тие се на посебен режим“, открива Анчелоти, кој кога станува збор за Роман Абрамовиќ вели: „Го сака фудбалот. Нема многу разлика меѓу него и Берлускони. Разговараме често, но не секој ден. Така беше и со Силвио, ама како и Роман, и тој има други проблеми, како на пример да ја води државата!“.
Фергусон тврди дека Овен
во 25 меЧа Ќе постигне 15 гола
По заминувањето на Тевез и Роналдо трансферот на Мајкл Овен многу навивачи на Јунајтед го пречекаа со скепса. Сепак, Овен малку ги потсмири со двата гола во трите подготвителни меча на клупската турнеја по Далечниот Исток. И покрај тоа што Овен подолго време го мачат повреди, Алекс Фергусон многу добро знае колку може некогаш стандардниот репрезентативец.
„Веќе даде два гола, но тоа е само почеток. Според мене, наредната сезона може да одигра 25 меча во топ форма во кои може да постигне 15 гола“, смета Фергусон, кој не издржа да не ги прокоментира настаните кај соседите од Манчестер сити. „Купија многу играчи, тоа е сега нов тим. Но, тоа е пак мал клуб со исто таков менталитет. За се' што можат да зборуваат е Манчестер јунајтед. Од тоа не можат да побегнат. Мислат дека со тоа што го купија Тевез триумфираа, ама тоа е јадно“, смета Фергусон.
Сосема спротивно мислење има тренерот на Интер Жозе Мурињо: „Адебајор и Тевез во нападот - неверојатно! А уште ги имаат и Санта Круз и Робињо. Каква напаѓачка сила. Тоа е тоа. Сити може да биде првак“, одушевено коментираше Мурињо. |
