Министерствата за здравство и за образование од денеска ќе почнат да поставуваат апарати со средства за дезинфекција во сите училишта, градинки и социјални установи за децата да се заштитат од т.н. свински грип. Министерот за здравство, Бујар Османи, вчера им порача на родителите да не ги пуштаат во училиште децата со симптоми на грип. Наставниците, пак, ќе водат строга контрола за отсуствата на учениците и за причините за отсуството. Според министерот, не треба да постои загриженост доколку апаратите не се поставени, а како мерка за заштита од грипот тој спомена дека најдобра превенција е често миење на рацете.

„Почетокот на учебната година се смета за критична точка, која може да го зголеми бројот на новозаболени. Од денеска Државниот санитарен инспекторат ќе наложи спроведување нови противпандемиски превентивни мерки и ќе ги зачести контролите во училиштата, градинките и социјалните установи. Институтот за јавно здравје ќе ги едуцира наставниците за новиот грип, а на првиот училиштен час ќе одржат предавање за лична хигиена. Ќе се дезинфицираат сите простории и ќе се постават апарати со слаби средства за дезинфекција. Установите ќе добијат и информативен материјал“, изјави Османи.

Министерот дополни дека Македонија е една од ретките држави каде што нема внатрешно ширење на болеста, туку сите случаи се внесени од странство. Тој додаде дека до вчера во земјава се регистрирани 42 случаја на грипот А (Х1Н1), а во последните 10 дена не е регистриран нов случај. (Д.Р.)