По повод 70-годишнината од почетокот на Втората светска војна, Владата вчера ги осуди фашизмот и примената на сила и насилство за остварување политички цели, оддавајќи почит на 50 милиони луѓе кои ги загубија животите. Истовремено, Владата изрази огромна почит спрема оние кои се бореа за слободата и независноста на Македонија.

„Во овој момент уште еднаш изразуваме огромна почит кон храбрите луѓе кои самопрегорно застанаа во одбрана на слободата насекаде низ светот и кон борците од Народноослободителната војна, кои застанаа на браникот на татковината и со своето дело ги зацврстија темелите на нашата слободна, независна и самостојна држава Република Македонија“, се вели во соопштението.

На 1 септември 1939 година, Хитлеровиот Рајх ја нападна Полска, со што и официјално започна големата војна. „Одбележувањето на овој датум е момент кога сите заедно треба да се потсетиме на неколку моменти за да можеме сите заедно да креираме подобра и посреќна иднина“, порачува Владата, при што покрај осудата на фашизмот и примената на сила и насилство за остварување политички цели, остро се осудуваат и антисемитизмот, непочитувањето на човечкиот живот и достоинство, убиствата, палењата, протерувањата, мачењата, концентрационите логори.

„Во овие моменти повторно ја согледуваме и ја славиме големината на соработката помеѓу народите, почитувањето на човекот и човековото достоинство, почитувањето на принципот на самоопределувањето на нациите и нескротливиот дух за слобода“, се вели во соопштението до медиумите. (Д.Р.)