Саат кулата во Битола алергична на песни за партизани?

Историската песна за херојот Таки Даскало, најверојатно, заминува во историјата

БИТОЛА - Историската песна „Таму ле мајко, близу Битола“, посветена на народниот херој Таки Даскало, која градскиот часовник во Битола со години и децении ја отчукуваше во исто време, најверојатно, заминува во историјата. Со замената на механизмот на градскиот часовник од пред неколку дена се заменуваат и песните што ги репродуцираше часовникот, означувајќи точно време. Сега единствено останува свечената песна на Битола од Ајри Демировски, која пее за „Битола мој роден крај“, додека на местото на сите други ќе има нови, најверојатно, песни на збратимените градови од светот со Битола.

Ваквите новини што ги најави градоначалникот на Битола, Владимир Талески, отворија жестока дебата во Советот. Реагираше опозицијата, а револтирано е и семејството на народниот херој Таки Даскало од Битола.

„Ме вознемири чинот што партиите на власт сакаат да ја сменат историјата. Историјата не се менува. Овие песни се напишани за животот на луѓето кои загинаа за оваа земја. Таки Даскало не беше анонимус, го познаваа на просторите на цела поранешна Југославија. Мојата реакција до општината е да не се обидува да ја менува вистината и историјата поврзана со овој град“, рече револтирано Драгица Мисирлиевска (71), снаа за брат на загинатиот партизан.

Битолската опозиција не остана рамнодушна на промените што ги донесе поправката на механизмот на Градскиот саат во Битола. Локалната власт со свеченост и присуство на високи гости од државата и од странство во саботата го прослави заменувањето на механизмот на Градскиот часовник во Битола, кој со години беше надвор од функција. Станува збор за германска донација вредна 10 илјади евра. Но, од сите пет песни кои саатот ги репродуцираше, по реконструкцијата единствено се слушна само „Битола, мој роден крај“. Ова ја отвори дилемата во јавноста дали песните кои се дел од историјата на Битола поврзани со народните херои од Втората светска војна и натаму ќе останат на репертоарот.

„Со сигурност тврдам дека беше расипан само механизмот на часовникот, а не и механизмот што ги репродуцираше песните. Не знам дали намерно или не, песната за Таки Даскало не можела навреме да се вметне. Најверојатно, затоа што е од социјалистичко време“, рече од говорницата Борис Чоревски, советник на опозиционата СДСМ.

Наместо песните од минатото, градоначалникот на Битола има нова идеја - да се фаворизираат песните на земјите кои имаат почесни конзулати во Битола, како и песни о�� збратимените градови. Целта е да се афирмира мултикултурната традиција на Битола.

„Со новиот механизам имаме уште поголема можност од она што го имавме. Градскиот саат имаше мелодии и веројатно тоа беше полниот капацитет, но овој новиот може многу повеќе. Апсурдно е да вградиме еден таков механизам, а да не го искористиме и да остане само на една песна“, рече Талески од советничката говорница.

За битолчани градскиот часовник изграден некаде во 16 век е еден од најмонументалните културни споменици. Тој отсекогаш бил мерач не само на времето, туку и на режимите. Граѓаните паметат дека во почеток од вградувањето на механизмот се слушала химната за кралството СХС, потоа „Хеј, Словени“, па македонската химна. Сега, како што најави власта, ќе се слушаат и химни на странски држави. (А.Б.)