Поглед

Опомени од Струга

Мики Трајковски

Во Струга, која некогаш пленеше со својот шарм, убавина, гостопримство, веќе ништо не е како порано. Во градот на поезијата стихијно никнуваат разни објекти, спротивни на старата струшка архитектура. Најважен од се' е профитот. Отворањето бизнис не зависи само од џебот, туку повеќе од контактите со власта.

Трагедијата на тројцата угледни стружани што се случи поради неисправна инсталација на див шанк покрај Охридското Езеро, ја отвори пандорината кутија за состојбите во некогаш убавата и мирна Струга. Исплива прашањето кој беше надлежен за контроли, казни, уривање.

Се покажа дека инспекторите во локалната и во централната власт недоволно ги познаваат сопствените надлежности. Земаат плата од народот, а кога треба да работат во негов интерес, тогаш замижуваат и глумат немоќ. Потоа најлесната одбрана е да се префрлува топката на одговорност.

Изгубените животи опоменуваат. Но, потресниот случај во Струга како да беше „секое чудо за три дена“. Запрепастувачка е изјавата на министерот за економија, Фатмир Бесими, кој во одбрана на своите инспектори го кажа клучниот аргумент - тие не можеле да затвораат, бидејќи на објектите немало врати?! А локалните власти, пак, немале врска ама баш со ништо.

Страшно е да се помисли, но зарем требаше да загине, не дај боже, некој близок на министер, градоначалник, советник, инспектор, па да се смени нешто. Кога конечно Струга ќе биде приоритет за оние што се на власт или за оние што беа на власт?

Струга опоменува. Македонците и Албанците повеќе не се дружат во овој град. Младите не излегуваат на исти места како некогаш. Градот е поделен на зони. Ова нека биде поука за функционерите што седат во удобните фотелји, дека треба да направат нешто за Струга.