Рикер: Инвеститорите сакаат предвидлива бизнис-клима
Глобалната економска криза има свое влијание и во Македонија, но таа не е толку погодена од неа како другите земји“, изјави американскиот амбасадор Филип Рикер по вчерашната посета на Македонската берза. „Директните инвестиции се важни, но на бизнис-средината треба да се гледа пошироко, како што е заинтересираноста и на инвестициските фондови за влез во земјата. Македонската берза е вистинското место за тоа, а за да го сторат тоа, треба да се запознаат со Берзата. Македонија сака да биде атрактивна не само за инвеститорите туку и за бизнисмените и затоа таа треба да има предвидлива бизнис-клима, ефикасна регулаторна структура, спроведување на договорите и судски систем во кој сите ќе имаат доверба“, рече Рикер. Тој истакна дека САД во изминатиот период ги поддржуваа економските реформи во државата и најави дека таа поддршка ќе продолжи.
Директорот на Македонската берза, Иван Штериев, истакна дека на средбата го запознал амбасадорот Рикер со историјата на Берзата, функционирањето, како и за влијанието на глобалната криза во земјата, регионот и пошироко, но и за мерките што се преземаат. „Анализиравме што правиме ние и другите берзи во тој поглед. Кои мерки се преземаат - прекин на тргување: да или не, ценовни ограничувања и друго и заедничко е мислењето дека, имајќи ги предвид спецификите на нашиот пазар и развојната фаза во која не затече оваа финансиска криза, преземаме и многу повеќе од некои други берзи и глобално и во регионот“, рече Штериев. (МИА) |
