Малиот драмски театар гостува во Лондон со претставата „Столови“

Битола - Бугарскиот актер Анастас Поп Димитров ќе биде вклучен во затворањето на манифестацијата „Македонски денови на културата“ во Лондон. Манифестацијата, всушност, свечено ќе се затвори на 28 ноември со претставата „Столови“ од Јонеско на Малиот драмски театар од Битола, а во која покрај актерот од Бугарија, игра и доајенот на македонското глумиште, Јоана Поповска.

Претставата „Столови“ на почетокот се играше како монодрама, а сега, во режија на Љупчо Ѓоргиевски, добива нова форма.

На вчерашната прес-конференција, која се одржа по повод гостувањето на Мал драмски театар во Велика Британија, присуствуваше и актерот Поп Димитров, кој воедно е и директор на Националниот театар „Иван Вазов“ во Софија. Бугарскиот актер во претставата ќе зборува на македонски јазик.

„На прв поглед , бугарскиот и македонскиот јазик се блиски јазици, но, сепак. не е така. Тешко е, но со задоволство го правам ова. Ќе ми биде забавно кога моите колеги во Бугарија ќе ме гледаат како говорам на македонски“, рече Поп Димитров. „Ако еден врвен актер од Бугарија говори на македонски јазик, сигурно публиката нема да му забележи на акцентот. Тоа е наш голем плус“, рече Благоја Стефановски, творец на Мал драмски театар. „Театарот не познава јазични бариери“.

По премиерата во Лондон, претставата „Столови“ ќе гостува во Националниот театар во Софија, а ќе учествува и во одбележувањето на јубилејот - 100 години Кралски театар „Зетски дом“ во Цетиње. (А.Б.)