Претходен број

Двајца градски функционери во притвор поради барање за донација

Златко Соколиќ се товари за посредување, а Јован Христовски за злоупотреба на службената положба

Љубиша Станковиќ
Деспина Трајковска

Поранешен и сегашен градски функционер завршија во притвор и за нив е поведена истрага поради сомневање дека учествувале во сомнителен тендер за набавка на сообраќајна сигнализација во Скопје. Станува збор за Златко Соколиќ (50), бивш консултант за економско-финансиски работи на поранешниот скопски градоначалник Трифун Костовски и Јован Христовски (37), раководител на Секторот за сообраќај на град Скопје и претседател на Комисијата за јавни набавки. Тие завчера беа приведени поради сомневање за злоупотреба на 8.200 евра. Според барањето за истрага поведено од страна на Јавното обвинителство, Соколиќ се товари за противзаконито посредување, а Христовски за злоупотреба на службената положба. По дадена одбрана, истражниот судија им одреди на двајцата осомничени 30-дневен притвор и тие од вчера се во затворот „Скопје“.

На приведувањето на двајцата градски административци во судот, претходело нивно апсење откако биле побарани пари за донација. Според полицијата, Златко Соколиќ ја искористил својата положба и влијание и посредувал при склучување договор за набавка на семафорска опрема, а кој договор требало да биде одобрен од Христовски. Токму Христовски бил тој што иницирал постапка за набавка, а во договор со Соколиќ, го пролонгирал потпишувањето на договорот со скопската фирма „Електрософт“. Станува збор за фирма која во 2005 година поставила семафори на четири раскрсници на подрачјето на град Скопје, но тие го условиле сопственикот на „Електрософт“, како донација да уплати 500 илјади денари.

Имено, „Елекрософт“ имал долга соработка со Градот, но и континуирани ненаплатени побарувања. Пред четири години, „Елекрософт“ поставила семафори кај Железничката станица, кај булеварот кај студентскиот дом „Гоце Делчев“ и во населбата Хром, но за опремата на две раскрсници се' до минатата година немало постапка за јавна набавка.

Осомничениот Христовски, во октомври минатата година, доставил барање за јавна набавка до Секторот за јавни набавки, иако знаел дека работата е веќе извршена уште во 2005 година. На постапката за избор на најповолен понудувач била избрана токму „Електрософт“, но писмен договор не бил склучен. Управителот на фирмата остварил контакт со Златко Соколиќ, кој, пак, му укажал на тоа дека доколку сака да биде склучен договорот, треба да уплати износ од 500.000 денари на име донација, информираат од МВР.

На 30 март оваа година година бил склучен договор со Јавната установа „Зоолошка градина - Скопје“, а веќе следниот ден „Елекрософт“ ги уплатил бараните средства, а на 6 април „Елекрософт“ бил известен дека договорот за јавната набавка е потпишан и од градоначалникот на Скопје. Барањето за уплата на половина милион денари во МВР го пријавиле од „Електрософт“, по што била спроведена акцијата.

„Не сакам да коментирам ништо во врска со случајот додека во целост не заврши судската постапка“, ни изјави вчера кусо поранешниот скопски градоначалник Трифун Костовски. Истовремено, тој одби и да ги коментира шпекулациите оти, наводно, власта со притворањето на некогашните негови соработници започнува хајка против него.