Европската безбедносна политика значајна и за регионот
ОХРИД - Во организација на Министерството за одбрана со поддршка на Франција, како актуелен претседавач на ЕУ, вчера Во Охрид започна дводневната Регионална конференција за европска безбедност и одбранбена политика (ЕБОП), на која учествуваат претставници и делегации од 25 земји од регионот и од Европа.
Министерот за одбрана, Зоран Коњановски, на отворањето на конференцијата пред присутните истакна дека димензиите на овој собир се потврда на значењето на европската безбедносна и одбранбена политика за регионот, Европската унија и многу пошироко.
„Европската безбедносна и одбранбена политика стана неразделив дел од европската интеграција и едно од најважните прашања од интерес за меѓународната безбедносна сцена денес“, истакна Коњановски, додавајќи дека овој регион успеа непоколебливо да чекори напред.
Евроамбасадорот Ерван Фуере истакна дека одржувањето на оваа конференција е извонреден начин да се нагласи соработката во областа на одбраната и безбедноста. „Како идна членка на Унијата, Македонија ќе треба да преземе многу одговорности во областа на одбраната и безбедноста, а оваа конференција е добра подготовка за она што ќе се очекува од неа во иднина“, истакна Фуере. Францускиот амбасадор Бернар Валеро рече дека бројот на учесниците и делегациите на конференцијата е потврда на важноста од регионалната безбедносна соработка, но и пошироко во Европа, што е и еден од приоритетите на Франција како актуелен претседавач со ЕУ. (МИА)
|
