Претходен број

СПМ повикува на единство во однос на прашањето за името

Социјалистичка партија вчера на прес-конференција изрази загриженост од манифестираното неединство на претседателот Црвенковски и членовите на македонската делегација во САД.

„Тоа е срамно и крајно негативно се одразува врз интересите на Република Македонија, затоа што прашањето за името на Македонија е прашање од највисок државен интерес, рече на вчерашната прес-конференција портпаролот на партијата, Малиша Станковиќ.

Никој и со ниту една постапка не смее да го загрози ова прашање, додаде тој, затоа што нема таков мандат од граѓаните на Република Македонија. „Сигурни сме дека македонскиот народ знае како да им пресуди на сите оние кои во минатото или денес ги продавале и продаваат македонските интереси, а тоа кога-тогаш ќе им се врати како бумеранг, истакна Станковиќ.Во овој контекст, рече тој, Социјалистичката партија го повикува претседателот на Република Македонија да постапи во согласност со своите обврски според Уставот и со своето однесување да придонесе интересите на сите граѓани на Македонија да бидат ставени пред сите други интереси. (П.Р.)