Фирмите со поповолни оцени во ноември

Раководителите на деловните субјекти во преработувачката индустрија ја оценуваат ноемвриската економска состојба како поповолна во однос на ноември минатата година.

Според податоците од Државниот завод за статистика, оцената за обезбеденоста на производството со порачки е поповолна во однос на претходниот месец. Обемот на производството на деловните субјекти во ноември 2010 година бележи мал пад во споредба со претходниот месец, очекувањата за обемот на производството во наредните три месеци се поповолни, а очекувањата за бројот на вработените се малку понеповолни. Во ноември 2010 година резервите на суровини и репроматеријали, како и сегашните набавки, се под и околу нормалата. Резервите на готови производи во ноември 2010 година се зголемени во споредба со претходниот месец.

Според оцената на раководителите, во наредниот период просечните набавни цени на инпутите ќе се зголемат, како и продажните цени на готовите производи. Просечното искористување на капацитетите на деловните субјекти во ноември 2010 година изнесува 61,3 отсто од нормалното искористување. Најголемо влијание врз ограничувањето на обемот на производството во ноември 2010 година имаат недоволната странска побарувачка со 20,5 отсто, недоволната домашна побарувачка со 17,1 отсто, финансиските проблеми со 10,7 отсто и неизвесното економско опкружување со 10,4 отсто. (Ек.Р.)