Еруптираше вулканот во Индонезија

ЏАКАРТА - Еден од најопасните вулкани во Индонезија откако почна да еруптира одзеде 15 животи, принудувајќи илјадници лица да ги напуштат планинските села прекривајќи ги околните села и градови со пепел, јавија вчера очевидци на настанот. Вулканот Мерапи на периферијата на градот Јогјакарта на островот Јава еруптираше во вторникот, еден ден по цунамито што ги погоди далечните острови во западниот дел на Индонезија, убивајќи повеќе од 100 лица. Камерманот на Ројтерс видел шест изгорени жртви како биле симнати од планината во мртовечки вреќи, и уште најмалку деветмина починале од изгореници во болницата Сардџито во Јогјакарта. Властите се обидуваат да евакуираат повеќе од 11.000 селани што живеат во подножјето на вулканот. „Телата што ги видов во болницата беа прекриени со пепел. Имаше и жени и мажи“, изјави тој. „Луѓето се' уште се евакуираат“.

Облаци чад и пепел го прекрија врвот на планината, правејќи да биде невозможно да се види ако почне да се излева лава, открива тој. Куќите во селото Кинахредџо се уништени. „Неколку куќи и добиток се изгорени од врелиот облак од планината“, вели тој. „Сите куќи се прекриени со пепел, целосно се бели. Лисјата на дрвјата се изгорени“. Индонезискиот информативен портал „Окезоне“ го цитираше менаџерот на меѓународниот аеродром Адисукипто во Јогјакарта како вели дека нема откажани летови поради облаците со пепел. (Ројтерс)