Претходен број

Лидерите на ЕУ ќе ни дадат само обврски

Фер избори, политички дијалог и решавање на името се најважните обврски за нас

Од нашиот дописник
Слободанка Јовановска

Брисел - Македонија и официјално нема да добие ништо на самитот на ЕУ идната недела, освен обврските да одржи фер избори, да го реши спорот со Грција и да го подобри политичкиот дијалог во земјата.

Ова е содржината на заклучоците во завршниот документ од самитот, кои се пресликани, всушност, од ноемвриските заклучоци на Европската комисија за прогресот на Македонија. Идната недела лидерите на ЕУ практично ќе потврдат дека нема волја да се охрабри Македонија со ништо друго освен можеби со визите, но и тие нема да се најдат во завршниот документ в петок, бидејќи се' уште нема ни предлог од Европската комисија околу ова прашање.

„Нема ништо ново за Македонија. Јазикот што беше користен досега за земјата ќе се повтори и на самитот. Ништо важно, всушност, не се случи од последниот извештај на ЕК досега за тој да биде сменет“, изјавија извори од ЕК.

Во заклучоците ќе се потврди прогресот на Македонија во неколку области, а особено во судскиот систем и во полицијата, но ќе се посочи лошиот политички дијалог во земјата со барање да се подобрат односите меѓу главните политички актери и да се овозможи нормално функционирање на институциите.

Околу спорот за името се бара да се избегнуваат потези и изјави кои можат да влијаат негативно на добрососедските односи, кои се оценуваат како суштински, со задолжителната фраза потоа дека се охрабруваат двете страни да најдат заедничко прифатливо решение за спорот околу името. Македонија, стои натаму, ќе може да го направи следниот чекор во приближувањето кон ЕУ откако ќе ги исполни заклучоците од Европскиот совет од 2005 година и критериумите од Копенхаген, а треба, пред се', да гарантира дека ќе организира фер и слободни избори идната година.

Како и да е, во генералните заклучоци за Западен Балкан ЕУ-лидерите ќе не' уверуваат повторно дека се цврсто определени да не' примат во Унијата, дека имаат консензус околу тоа прашање и дека тој се базира на решеноста да се држат до ветувањата откако претходно ќе обезбедат „фер и ригорозно почитување на критериумите“. Притоа, не е јасно зошто треба да го нагласуваат тоа во ваков документ кога секогаш тврдат дека исполнувањето на условите е единствен услов за прием и дека сите земји се оценуваат според постигнувањата.

Лидерите, како што најавија од француското претседателство, во голема мера кон регионот ќе се држат до оценките на ЕК, а какви беа тие ни е познато од ноемвриските извештаи.

В понеделник, д��дека трае министерскиот состанок на ЕУ, ќе се одржи годинашниот Совет за стабилизација и асоцијација со Македонија, на кој од европска страна ќе присуствува Жан Пјер Жује, а од македонска министер Антонио Милошоски, во неизбежна придружба на вицепремиерот за евроинтеграции Ивица Боцевски. Од овој состанок, исто така, ќе излезе завршен документ во кој пошироко ќе бидат наброени постигнувањата и слабостите во повеќето важни области, и кој во голема мера ќе биде, исто така, „фотокопија“ на ноемвриските оценки, со дополнително нотирање на промените таму каде што ги има.

Со оглед на тоа колку време ги слушаме тие оценки и во колку наврати беа напишани во документите на ЕК, македонските граѓани можат и сами да си ги изрецитираат. Генерално, оценката за политичкиот дијалог, која со изборите беше клучна според ЕК да не добиеме датум, нема да биде така негативна како во извештајот, бидејќи никој веќе не го бојкотира парламентот и нема тензии како летото.

Со оглед на тоа дека Париз крена раце и од туркањето на Србија, бидејќи извештајот за соработката со Хашкиот трибунал се' уште е со дупки, сите напори на француското претседателство во однос на регионот се насочени кон Хрватска за да можат на крајот да си го обелат образот и да кажат дека не го маргинализирале регионот сосема.

Француски извори вчера демонстрираа подготвеност да ги одблокираат преговарачките поглавја со Хрватска, што предизвика паника меѓу словенечките дипломати, бидејќи станува очигледна намерата на Париз да ги маргинализира нивните настојувања прво да се реши граничниот спор, а потоа да и' се дозволи на Хрватска да оди напред. Намерата на Франција е токму обратна, т.е. Хрватска да продолжи со преговорите, а спорот да се решава потоа, и тоа билатерално, а не преку блокади во Унијата. (С.Ј.)