Претходен број

Учениците со петиција ќе се бранат од екстерното оценување

Се' уште не се знае што и кога ќе се полага, иако од Министерството најавија дека веќе ги доставиле распоредите

Жаклина Хаџи-Зафирова

Учениците од основните и од средните училишта собираат потписи за петиција со која ќе бараат да бидат ослободени од полагање на екстерните тестови. Педесетина ученици вчера повторно се собраа на протест пред Министерството за образование и наука, но се разбегаа откако ги забележаа телевизиските камери и новинарските екипи. Тие не сакаа да откријат детали околу петицијата, само појаснија дека ќе ја испратат до ресорното министерство.

Учениците се' уште не знаат што и кога ќе полагаат, иако од Министерството најавија дека уште во петокот ги доставиле распоредите со термините за полагање и наставните предмети. Паника има посебно кај осмоодделенците кои треба да бидат тестирани веќе од идната среда, а се' уште не знаат по кои предмети. Дилеми околу екстерното оценување има не само кај учениците, кои најавија дека е можно да ги бојкотираат тестовите, туку и кај професорите, кои се плашат дека прашањата може да не се совпаѓаат со материјалот. За нив е проблематично тоа што во различни гимназии се учи од разни учебници, што би можело на крајот да ги збуни учениците поради различните начини на кои се презентирани содржините во учебниците.

„Во средните училишта се учи од разни учебници. Не се проблем фактите, но проблем е различниот начин на прикажување на фактите и податоците, што секако може да ги доведе учениците во недоумица како да го одговорат прашањето“, вели еден од директорите на средните скопски училишта кој инсистираше да остане анонимен. Уште попроблематично, вели тој, е поради фактот што не се знае кој учествувал во подготовката на прашањата.

Некои негови колеги стравуваат дека тестовите ќе бидат направени според европски критериуми, кои не соодветствуваат докрај со нашиот систем.

За разлика од него, други директори ја негираат оваа можност.

„Во изготвувањето на тестовите учествуваа професори од средните училишта во соработка со советниците од конкретниот наставен предмет. Така што не може на тестот да се падне нешто што не е во наставниот предмет“, ни изјави директорот на средното училиште „Орце Николов“, Ѓорѓи Китански.

Според него, распоредот кој предмет ќе го полагаат учениците од одделни класови го прави училишната комисија, а учениците би требало да бидат запознати кои предмети ќе ги полагаат 10-15 дена пред полагањето.

Во некои основни училишта ни ја потврдија информацијата дека, како и во повеќето средни училишта, не го добиле распоредот за полагање, а се очекува да го добијат најдоцна до денеска.

Во училиштата стравуваат и за компјутерскиот систем кој претходно во два наврата не успеал да ги издржи пробните екстерни тестирања во неколку скопски средни училишта. А не издржала ниту Интернет-конекцијата. За овие проблеми директорите добиле цврсти гаранции од министерот за информатичко општество, Иво Ивановски.

Никој во Министерството за образование и наука не е расположен да даде официјална изјава и да објасни кога ќе пристигнат распоредите за полагање или, пак, да ги коментира реакциите од училиштата. А ваквата ситуација во Министерството трае подолго време, откако последната портпаролка Маја Корубин си замина од оваа институција.

Сите се вадат со образложение дека „немаат овластување“ да даваат изјави, па инсистираат нивните имиња и презимиња да не се цитираат. Од она што го наведуваат е дека уште во петокот биле испратени известувања до училиштата за термините и предметите за полагање. Но, нивните „овластувања“ завршуваат дотука.