Светскиот првак Русија во аут

Четата на Трефилов изгуби од Шпанија со 30:22 и се прости од полуфиналето на ЕП во ракомет за жени

За селекцијата на светскиот шампион Русија заврши 9. Европско првенство во ракомет за жени во Данска и во Норвешка, барем што се однесува до пласманот во полуфиналето. Најдобриот тим на минатогодишниот мундијал во Кина изгуби во Хернинг со уверливи 30:22 од европскиот вицешампион Шпанија во второто коло од групата 1 од втората фаза. Пред натпреварот Русинките беа сведоци на победата на Романија над Црна Гора од 23:21, со што руските надежи за полуфиналето останаа живи. За нивното остварување беше потребно да се совладаат Шпанките и во последното коло Романките во директниот дуел за место во разигрувањето за медалите.

Но, избраничките на Хорхе Дуењас, кои немаа никакви шанси за полуфиналето, одиграа без притисок и за престиж. „Црвената фурија“ во таков стил и го почна мечот и по седум минути водеше со 7:0! Бесниот Трефилов побара тајм-аут, но тој немаше ефект, бидејќи противникот ја одржуваше разликата од седум кола до 26 мин., кога на семафорот стоеше 15:8. Русија ја намали негативата на 12:16 пред паузата, но во второто полувреме Шпанките стигнаа и до предност од осум погодока и го решија прашањето на победникот.

„Русија ќе се пласира на првенството на местото што го заслужи“, беше единственото што го прокоментира трофејниот Трефилов по средбата.

Благодарение на поразот на Хрватска од соорганизаторот Данска од 31:19, Данките и Романките и теоретски се полуфиналист, без оглед на резултатите од денешниот последен круг од втората фаза на шампионатот.

Наспроти групата 1, во групата 2 во Лилехамер никој не е сигурен, бидејќи дури пет репрезентации денеска ќе бидат во игра за двете места што водат во борбата за медалите.



ФРАНЦИЈА ЈА ЗАПРЕ ШВЕДСКА



Група 1, второ коло: Романија - Црна Гора 23:21, Шпанија - Русија 30:22, Данска - Хрватска 31:19. Табела: Данска 8, Романија 6, Црна Гора 4, Русија 2, Хрватска 2, Шпанија 2. Последно коло, денеска: Романија - Русија (16,45 ч.), Шпанија - Хрватска (18,45 ч.), Данска - Црна Гора (20,45 ч.).

Група 2, второ коло: Холандија - Унгарија 27:19, Шведска - Франција 21:22, Украина - Норвешка 19:32. Табела: Норвешка 6, Шведска 6, Холандија 4, Франција 4, Унгарија 4, Украина 0. Последно коло, синоќа: Украина - Франција, Шведска - Унгарија, Холандија - Норвешка.